نساء مصر

سلامًا على سيدات مصر فلولاهن ما بقيت مصر وما ظلت البيوت واقفة صلبة أمام كل طوفان يجيء

انكسار

بينما كنت في المنزل أشاهد التلفاز، تلقيت رسالة هاتفية من صديقي؛ تقول أن شيئاً ما حصل معه وأراد مني مساعدته. لم يرغب في التحدث على الهاتف وفضل أن يراني ليخبرني ما حدث.
ذهبت لمقابلته في حدود الساعة الثامنة مساء، الشوارع كانت مكتظة بالسيارات لا أدري لماذا وكأنه يوم الحشر، على الرغم من أن اليوم هو الجمعة، وفي هذا الوقت من يوم الجمعة تكون الشوارع فارغة. آآآخ تذكرت هناك مباراة كرة قدم، لا أذكر الفرق ولكن أتذكر أن بثينة زميلتي في العمل ذكرت هذا بالأمس. لا يهمني أمر المباراة أو أي مباراة لم يعد شيء يهم، وهذا الآخر الذي يهاتفني في يوم راحتي جعلني أقلق بشدة، هو صديقي، نعم صديقي منذ سنين طويلة لم أعد أحسب لها حسابات فالأبيض يغزو رأسي بهدوء لذا لا يهم.
حسنا ها أنا الآن أقترب من المقهي، يبدو أن صديقي يجلس في ذات الركن الذي لم يتركنا أو نتركه منذ أيام الثانوية العامة.
 كانت لحظات عجيبة، وكان هو أول من جلبنا إلى هذا المكان كي نصير كبار ولمً لا ونحن على مشارف الجامعة، كانت أيام...
ها أنت كيف حالك، أرعبتني يا رجل ما حدث لكل هذه الإثارة، رسالة غامضة وأهاتفك مرات لا تجيب وتكتفي بالرسائل! هل أكلت القطة لسانك؟!
ما هذا الوجه! وجه صديقي بائس وعجوز، لقد جعلني أدرك عمري وعمر أجدادي، ما بك يا صديق وأي ريح عصفت بشبابك وشيبتك هكذا؟ فجأة قام وتلحفني باكيًا منتحبا لا يصدر منه شيء سوى رجفة وبكاء وظل مرتميًا على جسدي وكأنه طفل، وكأن جسده كومة من العجين لا انتصاب له!
حاولت أن أهدئه، جلسنا ونادمت النادل أن يأتينا بعصير الليمون أو أي شيء لتهدئة صديقي.
جلسنا صامتين لعدة دقائق، لم أتكلم.
 بل بدأ هو الحديث، ماما ماتت...

اختناق القمر وبنات الحور

 في قريتنا كنا صغارا نصنع ضجيجا بالدق على الأواني القديمة وعلب السمن المهترئة ، نطوف بها القرية بكل شوارعها وأزقتها الضيقة. حتى تلك التي كنا نخشى العبور منها! نغني وندق في صخب وغضب ومرح صارخين في بنات السماء والأرض من الحور والجن، أن يعتقن القمر. يا بنات الحور خلوا قمرنا يدور يا بنات الجان خلوا قمرنا يبان نهتف وندق نصرخ وندق نغني ونجري جماعات مذيلة، نهر من الأطفال ينهمر داخل شوارع القرية طوفان عريض في مقدمته ومنتهاه طفل أو اثنين... كنا نحب القمر ونخشى غيابه فهو كستر الليالي رغم ضوئه الوضاح وسط السماء، تخسفه بنات الجن وحور الجنة يتعاركن عليه ويسيل دماؤهن بلا توقف لكي يفزن به، يتخضب بالدم أو يكتحل بالسواد على حسب أي الفريقين سال دماؤه أكثر، يخنقن القمر وننقذه نحن الأطفال بأغانينا الصارخة يا بنات الحور ده القمر مخنوق يا بنات الحور خلوا قمرنا يدور يا بنات الجان خلوا قمرنا يبان...

قراءة سريعة على المتن الأفريقي

في أمور لطيفة وتاريخية كحدث مهم يعني، حصلت على الصعيد الأفريقي وهي إن إثيوبيا وإرتريا بيصلحوا العلاقات بينهم حاليًا، وده عظيم جدًا ومبشر. وإثيوبيا فعليًا في طريقها أنها تكون أقوى قوة إقليمية في القارة لو فضلت ماشية على الخطوات الإصلاحية الحالية!

أخرها كان زيارة رئيس وزراء إثيوبيا (آبيي أحمد) لإرتريا والاستقبال الودود من قِبل (إيساس أفورقي) رئيس إرتريا واللي من الطبيعي ينتج من بعدها فتح الحدود وتسليم الأرض المتنازع عليها وفتح متبادل للسفارتين في الدولتين، والجزء الأهم ميناء مصوع وعودته كشريان حياة لإثيوبيا واللي هيؤثر بشكل قوي في الوضع الاقتصادي والاستثماري في إثيوبيا.

 تصفية الخلافات القديمة بين الدولتين والخلافات دي مش من 20 سنة زي ما أغلب الصحف بتتكلم، لأن الخلافات دي موغلة في القدم وأبرزها من وقت الزحف الاستعماري الأوروبي على القارة. وطبعا فكرة إن ميناء مصوع يبقى مفتوح لإثيوبيا بشكل رسمي ده غير المطارات مش حاجة عادية بالعكس ده انفراجة كبيرة. 

طب ليه لأن ببساطة إثيوبيا دولة حبيسة وجميع حدودها دول، وبالتحديد 5 دول محاوطينها، وهما إرتريا والصومال وجيبوتي والسودان وكينيا، وأهم منفذ لها هو ساحل إرتريا على البحر الأحمر نظرًا لطوله وعمقه الإستراتيجي، زمان كان في خناقة بين مصر وإثيوبيا دي بتاعتي لا دي بتاعتي، هوب قامت إيطاليا مغفلاهم هما الإتنين واشترت بالباطن عن طريق شركة ملاحة مساحة أراضي كبيرة من سلطان المنطقة وحطت إيدها على المكان وقالت دي بتاعتي ومستمعرتي ومعايا ورق وعملت معاهدة مع إثيوبيا ورسموا الحدود بينهم وشوية وقامت إيطاليا ساحبة على إثيوبيا ودارت بينهم معارك وللعلم مصر بعتت لإثيوبيا جنود تطوعوا وياهم وحاربت الطلاينة وكان في وفود رايحة وجاية، المهم إثيوبيا محتاجة تتنفس ويبقى لها تجارة خارجية وسفن رايحة وجاية في البحر مشيت إيطاليا بعد خسارتها في الحرب العالمية التانية قامت بريطانيا قالت لهم ضموا على بعض فرجعت إرتريا جنب الحبشة حتة واحدة. ودارت الخناقات ما بين حركات إرتيرية بتقاوم حكم إثيوبيا عليها ونشأ كفاح مسلح يبحث عن استقلاله، وتشتت الإرتيريين بين كذا بلد وانطلقت حركة تحرير إرتريا من مصر من خلال إنشاء الجبهة الديمقراطية الإرترية في القاهرة تنادي بتحرير الأراضي واستقلالها عن إثيوبيا، قامت إثيوبيا ضامة إرتريا لها كمحافظة من ضمن المحافظات الإثيوبية كل ده علشان مصوع والكنز الإستراتيجي اللي إثيوبيا بتطمح له سواء كانت في حكم إمبراطوري أو جمهوري لحد ما حصل وإرتريا أعلنت الاستقلال في التسعينات والعلاقات فضلت متوترة وأوضاع ضيقة استثماريًا بالنسبة لإثيوبيا ومكلفة لأنها حبيسة مافيش ساحل عندها. وطبعًا ساحل إرتريا مش أي ساحل ده موقع مهم جدًا ومؤثر على كل الدول المطلة على البحر الأحمر وطبعا على الناحية التانية اليمن. وزمان حصلت مشاكل وخناقة بين إرتريا واليمن علشان دي بتقول احتليتي جزري ودي تقول لا أنت اللي احتليتي جزري ورجعوا واتصالحوا المهم نبص ونشوف بيحصل إيه في اليمن نبص ونشوف بيحصل إيه مع مصر وتركيا وقعدتها في سواكن على البحر الأحمر في السودان واللعب اللي حاصل في البحر الأحمر، ده غير تراجع نفوذ اليمن مابقاش لها سلطة على باب المندب والبحر الحمر زي زمان، ونبص كده على إثيوبيا وإرتريا... على قدر ما اللي بيحصل بين البلدين عظيم جدًا ويمكن يساهم فعليًا في نقل أفريقيا نقلة اقتصادية مهمة جدًا لكن في الوقت نفسه مقلق أنه يكون بتحالفات القوى الجديدة اللي بتلعب في الخرايط قصاد بعض غُترة وطربوش...

حجاج عبد الرحمن

"رمشك غمز قلبي صحى الهوى فيَّ زقزق في عيني الشوق ضحك الهنا ليًَّ"
في أغنية على سهوة لعمر فتحي.
جملتها الموسيقية، هي نفس الجملة الموسيقية للمقطع التراثي الشهير "يونس خطر في السوق ولد الهلالية سلم على التجار ردوا له التحية" اللي غناه عتاولة الفن الشعبي في مصر زي الست خضرة محمد خضر، وغيرها من المداحين ومغنيين السيرة الهلالية، وده إن دل على شيء فهو إن التراث الشعبي في الموسيقى والغناء ثري لدرجة أن حرف منه يسوي البدع.
جدير بالذكر إن ملحن على سهوة هو الملحن حجاج عبد الرحمن صاحب أشهر أغاني طرقعت وعملت صدى في التمانينات كأغنيات شبابية مسمعة على رأسهم ميال ميال لعمرو دياب. اللطيف إن حجاج عبد الرحمن لما لحن لعمر فتحي لازم في كل أغنية يحط جملة موسيقية مقتبسة من التراث الشعبي المصري، زي أغنية على إيدك اتعلمنا، اللي عملها من موسيقى شمال شرق مصر من منطقة مدن القناة، وموسيقى السمسمية واضحة وجلية في الأغنية ويمكن ده خلق لأغاني عمر فتحي شخصية متميزة. وفعلًا لو جينا نركب الأغنية على لحن تاني مش هيطلع أبدًا بحلاوة اللحن اللي عمله حجاج الله يرحمه... 

عمر فتحي - على سهوة 
 


خضرة محمد خضر - ولد الهلالية 



 عمر فتحي - على إيدك اتعلمنا 

ليل يا أبو الليالي

الله ليل يا أبو الليالي من أحلى أهازيج التراث اللي بتجمع النوبي على السواحلي على الصعيدي ❤️

من المفروض إن لحن ليل يا أبو الليالي بيجمع عدة صقفات متكررة متتالية كجزء من الأداء الموسيقي للأغنية والصقفة دي هي اللي بتميز تراث الغناء البحري على طول ساحل جبال البحر الأحمر بداية من منطقة القناة مرورا بالصعيد حتى أعالي النوبة في مصر والسودان. واللي بتشمل أغاني السمسمية وأغاني الكف وأغاني النوبة. هنا مثلًا الريس متقال وأخوه شمندي

https://www.youtube.com/watch?v=KQpDnWNBehg …

جامع بين الربابة كضلع أساسي في الموسيقى الصعيدي وهي وتريات من نفس الأسرة الكبيرة اللي منها السمسمية مع الإيقاع في الطبلة والصقفة

أما البحر أبو جريشة نقلها نقلة تانية وهو أنه يشغلها في موسيقى النفخ من خلال فن الجاز وللعلم لو اتقال يا جاز في مصر لازم يتحط اسم البحر أبو جريشة كعلم من أعلام الجاز عندنا

https://www.youtube.com/watch?v=iKnkjncyut4 …

ورغم أنه حطها في موضع غير الصعيدي والنوبي والسواحلي لكنها فضلت محتفظة بنفس قوامها الموسيقي وإيحاء الصقفة لازم بشكل تلقائي تحس به كمستمع.

أما محمد هلال كموزع موسيقي ويمكن الأب الروحي من (وجهة نظري) في شغله لحميد الشاعري وهنلاقي هنا محمد هلال عامل توزيع قريب للنغم الليبي

https://www.youtube.com/watch?v=kKQKVQp4Ijw

يعني أخدنا لسكة تانية خالص بعيد عن بيئة الأغنية ولكنها فضلت متماسكة وكلحن أصيل منتشر في الصعيد ماكانش ينفع ما نسمعوش بصوت الريس حشمت متقال واللي مع الأسف تم نسبه للفنان عمر الجيزاوي وهي مش أغنيته ولا حتى صوته ده صوت حشمت متقال...

https://www.youtube.com/watch?v=PAhOedChpWw

3 سنين يا زوما

يا سي حمزة
يا أبو ضحكة بغمزة
الليلة دي عيدك
بالفرح ربي يزيدك

فرحتنا هلت بميلادك
ويا رب تِكتر أعيادك
يلا نصقف تلات صقفات
دي التورتة بتلات شمعات
حمزة تم تلات سنوات
هنصقف ونغني له

حمزة يا حموزي
يا أبو العيون فاروزي (فيروزي)
عيد ميلاد سعيد يا حمزة عيد ميلاد سعيد
عيد ميلاد سعيد يا حمزة حب وعمر مديد
حمزة حمزة قوم فرفش هات طبقك كسر فشفش
حتى لو جم يوم زعلوا مايهمش يلا ندشدش

حبا حبا حبا خطي وعدي
حبا حبا حبا اوعى تهدي
دي الأحلام دايما وردي
وفي يوم لازم أن تتحقق
عيد ميلاد سعيد يا حمزة عيد ميلاد سعيد
عيد ميلاد سعيد يا حمزة حب وعمر مديد

حمزة حمزة يا صغير هات ورقك يلا نطير
طيارة توصل بكره اللي بحلمك يتغير

ازرع أحلامك شجرة
تطرح لك فرحة لبكره
وتفرع مليون فكرة
تكبر تعرف تتعلم

عيد ميلاد سعيد يا حمزة عيد ميلاد سعيد
عيد ميلاد سعيد يا حمزة حب وعمر مديد
🎂   يلا هوف :))))
كُتبت احتفالا بعيد ميلاد حمزة بن محمود ودعاء 💗💗
5 يوليو 2018
 

أول سنة يا يزيد

يزيد وعيده جاي في العيد
وظابط نفسه في المواعيد
ميعاد للنوم وميعاد كلضوم ووقت يلعب ويبقى سعيد
نقيد الشمع لعيونه
وندعي ربنا يصونه
ونغني له في المواعيد
عيد ميلاد سعيد يا يزيد
عيد ميلاد سعيد يا يزيد
سنة حلوة يا جميل
سنة حلوة يا زي سنة حلوة يا زي

كل لحظة وأنت حلو وجميل يا حبيبي ❤❤❤❤❤ يلا هوف 🎂😄

تراث غناء الشعوب ورقصتي الحرب والصيد

التراث الغنائي للشعوب شيء عظيم جدًا رغم السف والسخرية اللي بيقابلها في الفترة الحالية على سبيل المثال المشهد اللي اشتهر من سنتين تلاتة لفيديو مجموعة من البدو بيستعدوا للصيد فغنوا بطريقة أشيع عنها هبل وتأخر وبلا بلا بلا....
الغناء جزء ثقافي مهم لأي حضارة سواء ارتجالي ومنفرد أو حتى مصحوب بالموسيقى.
اللطيف في الفيديو ده هو محاولة تطويع الصوت والتحكم في الحنجرة من بره وجوه من خلال الضغط عليها وإطلاق أصوات أشبه بصوت النداء للحرب أو الصيد. وشبيه لرقصة الحرب (رقصة الهاكا) اللي انتشرت من فترة لفرح عريس وعروسة من نيوزيلندا.
 واللي لسه محتفظين برضه بتراثهم الغنائي ونمط الصوت نفسه مش لمجرد حرب أو غيره هم المنغوليين. في منغوليا طريقة غناء بتغيير نبرة الصوت وتراث فضل مخصص للرجال وبس نظرًا لترددات الصوت اللي بتطلع ومع ذلك من وقت للتاني ظهرت بنات من منغوليا بتغني زيها زي الرجل ويمكن أقوى، وعلى الجانب الطريقة دي في الغناء شديدة الصعوبة لدرجة ممكن تتخيلوا أنها DJ مش صوت بشري خالص.
القصد حافظوا على تراثكم وافتخروا به وما هواش مدعاة للسخرية أو التأفف أو محاولة الطمس علشان بقى ياي متخلفين! 

فيديو من أوتاوا بكندا هتلاقوه على صفحتهم في الـ Facebook 

Black Bear Singers @ Solstice 2016, Ottawa On.


مغني ذكر من منغوليا يغني ويعزف



مغنية أنثى من منغوليا وده صوت لمغنية أنثى صوتها طبيعي وعادي زي الفيديو اللي فوق لذكر منغولي ولكن وقت الغناء الصوت حاجة تانية خالص.



ودول مجموعة متنوعة لفرقة منغولية وبيوزعوا صوتهم زي ما سامعين 



ودي الهاكا الماورية 




وده الفرح اللي انتشر مؤخرًا




ودي العيالة الإماراتية



رقصة الحرب اليمنية

أسود غطيس وأصفر رنان

"وأسود غطيس وأصفر رنان" سيد حجاب.
أعتقد إن الجملة دي لخصت الغربة وهجرة المصريين سواء للخليج المتمثل في الأسود الغطيس (البترول) أو الدول الأوروبية المتمثلة في الأصفر الرنان سواء كان ذهب أو شعر أصفر...