الاثنين، 9 يوليو 2018

قراءة سريعة على المتن الأفريقي

في أمور لطيفة وتاريخية كحدث مهم يعني، حصلت على الصعيد الأفريقي وهي إن إثيوبيا وإرتريا بيصلحوا العلاقات بينهم حاليًا، وده عظيم جدًا ومبشر. وإثيوبيا فعليًا في طريقها أنها تكون أقوى قوة إقليمية في القارة لو فضلت ماشية على الخطوات الإصلاحية الحالية!
أخرها كان زيارة رئيس وزراء إثيوبيا (آبيي أحمد) لإرتريا والاستقبال الودود من قِبل (إيساس أفورقي) رئيس إرتريا واللي من الطبيعي ينتج من بعدها فتح الحدود وتسليم الأرض المتنازع عليها وفتح متبادل للسفارتين في الدولتين، والجزء الأهم ميناء مصوع وعودته كشريان حياة لإثيوبيا واللي هيؤثر بشكل قوي في الوضع الاقتصادي والاستثماري في إثيوبيا.
 تصفية الخلافات القديمة بين الدولتين والخلافات دي مش من 20 سنة زي ما أغلب الصحف بتتكلم، لأن الخلافات دي موغلة في القدم وأبرزها من وقت الزحف الاستعماري الأوروبي على القارة. وطبعا فكرة إن ميناء مصوع يبقى مفتوح لإثيوبيا بشكل رسمي ده غير المطارات مش حاجة عادية بالعكس ده انفراجة كبيرة. 
طب ليه لأن ببساطة إثيوبيا دولة حبيسة وجميع حدودها دول، وبالتحديد 5 دول محاوطينها، وهما إرتريا والصومال وجيبوتي والسودان وكينيا، وأهم منفذ لها هو ساحل إرتريا على البحر الأحمر نظرًا لطوله وعمقه الإستراتيجي، زمان كان في خناقة بين مصر وإثيوبيا دي بتاعتي لا دي بتاعتي، هوب قامت إيطاليا مغفلاهم هما الإتنين واشترت بالباطن عن طريق شركة ملاحة مساحة أراضي كبيرة من سلطان المنطقة وحطت إيدها على المكان وقالت دي بتاعتي ومستمعرتي ومعايا ورق وعملت معاهدة مع إثيوبيا ورسموا الحدود بينهم وشوية وقامت إيطاليا ساحبة على إثيوبيا ودارت بينهم معارك وللعلم مصر بعتت لإثيوبيا جنود تطوعوا وياهم وحاربت الطلاينة وكان في وفود رايحة وجاية، المهم إثيوبيا محتاجة تتنفس ويبقى لها تجارة خارجية وسفن رايحة وجاية في البحر مشيت إيطاليا بعد خسارتها في الحرب العالمية التانية قامت بريطانيا قالت لهم ضموا على بعض فرجعت إرتريا جنب الحبشة حتة واحدة. ودارت الخناقات ما بين حركات إرتيرية بتقاوم حكم إثيوبيا عليها ونشأ كفاح مسلح يبحث عن استقلاله، وتشتت الإرتيريين بين كذا بلد وانطلقت حركة تحرير إرتريا من مصر من خلال إنشاء الجبهة الديمقراطية الإرترية في القاهرة تنادي بتحرير الأراضي واستقلالها عن إثيوبيا، قامت إثيوبيا ضامة إرتريا لها كمحافظة من ضمن المحافظات الإثيوبية كل ده علشان مصوع والكنز الإستراتيجي اللي إثيوبيا بتطمح له سواء كانت في حكم إمبراطوري أو جمهوري لحد ما حصل وإرتريا أعلنت الاستقلال في التسعينات والعلاقات فضلت متوترة وأوضاع ضيقة استثماريًا بالنسبة لإثيوبيا ومكلفة لأنها حبيسة مافيش ساحل عندها. وطبعًا ساحل إرتريا مش أي ساحل ده موقع مهم جدًا ومؤثر على كل الدول المطلة على البحر الأحمر وطبعا على الناحية التانية اليمن. وزمان حصلت مشاكل وخناقة بين إرتريا واليمن علشان دي بتقول احتليتي جزري ودي تقول لا أنت اللي احتليتي جزري ورجعوا واتصالحوا المهم نبص ونشوف بيحصل إيه في اليمن نبص ونشوف بيحصل إيه مع مصر وتركيا وقعدتها في سواكن على البحر الأحمر في السودان واللعب اللي حاصل في البحر الأحمر، ده غير تراجع نفوذ اليمن مابقاش لها سلطة على باب المندب والبحر الحمر زي زمان، ونبص كده على إثيوبيا وإرتريا... على قدر ما اللي بيحصل بين البلدين عظيم جدًا ويمكن يساهم فعليًا في نقل أفريقيا نقلة اقتصادية مهمة جدًا لكن في الوقت نفسه مقلق أنه يكون بتحالفات القوى الجديدة اللي بتلعب في الخرايط قصاد بعض غُترة وطربوش...

الأحد، 8 يوليو 2018

حجاج عبد الرحمن

"رمشك غمز قلبي صحى الهوى فيَّ زقزق في عيني الشوق ضحك الهنا ليًَّ"
في أغنية على سهوة لعمر فتحي.
جملتها الموسيقية، هي نفس الجملة الموسيقية للمقطع التراثي الشهير "يونس خطر في السوق ولد الهلالية سلم على التجار ردوا له التحية" اللي غناه عتاولة الفن الشعبي في مصر زي الست خضرة محمد خضر، وغيرها من المداحين ومغنيين السيرة الهلالية، وده إن دل على شيء فهو إن التراث الشعبي في الموسيقى والغناء ثري لدرجة أن حرف منه يسوي البدع.
جدير بالذكر إن ملحن على سهوة هو الملحن حجاج عبد الرحمن صاحب أشهر أغاني طرقعت وعملت صدى في التمانينات كأغنيات شبابية مسمعة على رأسهم ميال ميال لعمرو دياب. اللطيف إن حجاج عبد الرحمن لما لحن لعمر فتحي لازم في كل أغنية يحط جملة موسيقية مقتبسة من التراث الشعبي المصري، زي أغنية على إيدك اتعلمنا، اللي عملها من موسيقى شمال شرق مصر من منطقة مدن القناة، وموسيقى السمسمية واضحة وجلية في الأغنية ويمكن ده خلق لأغاني عمر فتحي شخصية متميزة. وفعلًا لو جينا نركب الأغنية على لحن تاني مش هيطلع أبدًا بحلاوة اللحن اللي عمله حجاج الله يرحمه... 


عمر فتحي - على سهوة 
 


خضرة محمد خضر - ولد الهلالية 



 عمر فتحي - على إيدك اتعلمنا 





يا أبو الليالي

الله ليل يا أبو الليالي من أحلى أهازيج التراث اللي بتجمع النوبي على السواحلي على الصعيدي ❤️
من المفروض إن لحن ليل يا أبو الليالي بيجمع عدة صقفات متكررة متتالية كجزء من الأداء الموسيقي للأغنية والصقفة دي هي اللي بتميز تراث الغناء البحري على طول ساحل جبال البحر الأحمر بداية من منطقة القناة مرورا بالصعيد حتى أعالي النوبة في مصر والسودان. واللي بتشمل أغاني السمسمية وأغاني الكف وأغاني النوبة. هنا مثلًا الريس متقال وأخوه شمندي
https://www.youtube.com/watch?v=KQpDnWNBehg …

جامع بين الربابة كضلع أساسي في الموسيقى الصعيدي وهي وتريات من نفس الأسرة الكبيرة اللي منها السمسمية مع الإيقاع في الطبلة والصقفة

أما البحر أبو جريشة نقلها نقلة تانية وهو أنه يشغلها في موسيقى النفخ من خلال فن الجاز وللعلم لو اتقال يا جاز في مصر لازم يتحط اسم البحر أبو جريشة كعلم من أعلام الجاز عندنا
https://www.youtube.com/watch?v=iKnkjncyut4 …

ورغم أنه حطها في موضع غير الصعيدي والنوبي والسواحلي لكنها فضلت محتفظة بنفس قوامها الموسيقي وإيحاء الصقفة لازم بشكل تلقائي تحس به كمستمع.
أما محمد هلال كموزع موسيقي ويمكن الأب الروحي من (وجهة نظري) في شغله لحميد الشاعري وهنلاقي هنا محمد هلال عامل توزيع قريب للنغم الليبي
https://www.youtube.com/watch?v=kKQKVQp4Ijw

يعني أخدنا لسكة تانية خالص بعيد عن بيئة الأغنية ولكنها فضلت متماسكة وكلحن أصيل منتشر في الصعيد ماكانش ينفع يعدي من تحت إيد عمر الجيزاوي من غير ما يغني فيه وبالإيقاع والصقفة...
https://www.youtube.com/watch?v=PAhOedChpWw

الأربعاء، 23 مايو 2018

تراث غناء الشعوب ورقصتي الحرب والصيد

التراث الغنائي للشعوب شيء عظيم جدًا رغم السف والسخرية اللي بيقابلها في الفترة الحالية على سبيل المثال المشهد اللي اشتهر من سنتين تلاتة لفيديو مجموعة من البدو بيستعدوا للصيد فغنوا بطريقة أشيع عنها هبل وتأخر وبلا بلا بلا....
الغناء جزء ثقافي مهم لأي حضارة سواء ارتجالي ومنفرد أو حتى مصحوب بالموسيقى.
اللطيف في الفيديو ده هو محاولة تطويع الصوت والتحكم في الحنجرة من بره وجوه من خلال الضغط عليها وإطلاق أصوات أشبه بصوت النداء للحرب أو الصيد. وشبيه لرقصة الحرب (رقصة الهاكا) اللي انتشرت من فترة لفرح عريس وعروسة من نيوزيلندا.
 واللي لسه محتفظين برضه بتراثهم الغنائي ونمط الصوت نفسه مش لمجرد حرب أو غيره هم المنغوليين. في منغوليا طريقة غناء بتغيير نبرة الصوت وتراث فضل مخصص للرجال وبس نظرًا لترددات الصوت اللي بتطلع ومع ذلك من وقت للتاني ظهرت بنات من منغوليا بتغني زيها زي الرجل ويمكن أقوى، وعلى الجانب الطريقة دي في الغناء شديدة الصعوبة لدرجة ممكن تتخيلوا أنها DJ مش صوت بشري خالص.
القصد حافظوا على تراثكم وافتخروا به وما هواش مدعاة للسخرية أو التأفف أو محاولة الطمس علشان بقى ياي متخلفين! 


فيديو من أوتاوا بكندا هتلاقوه على صفحتهم في الـ Facebook 

Black Bear Singers @ Solstice 2016, Ottawa On.


مغني ذكر من منغوليا يغني ويعزف



مغنية أنثى من منغوليا وده صوت لمغنية أنثى صوتها طبيعي وعادي زي الفيديو اللي فوق لذكر منغولي ولكن وقت الغناء الصوت حاجة تانية خالص.



ودول مجموعة متنوعة لفرقة منغولية وبيوزعوا صوتهم زي ما سامعين 



ودي الهاكا الماورية 




وده الفرح اللي انتشر مؤخرًا




ودي العيالة الإماراتية



رقصة الحرب اليمنية





الأربعاء، 9 مايو 2018

أسود غطيس وأصفر رنان

"وأسود غطيس وأصفر رنان" سيد حجاب.
أعتقد إن الجملة دي لخصت الغربة وهجرة المصريين سواء للخليج المتمثل في الأسود الغطيس (البترول) أو الدول الأوروبية المتمثلة في الأصفر الرنان سواء كان ذهب أو شعر أصفر...

الثلاثاء، 17 أبريل 2018

لو عديت حط حط

في حفلة من الحفلات اللي غنى فيها رشدي أغنية لو عديت، قال جملة في الأغنية غير مدرجة في باقي الحفلات والتسجيلات اللي غنى فيها نفس الأغنية، وللعلم الأغنية من كلمات عبد الرحيم منصور فمسألة التأكيد على إن الجملة من نظم رشدي ولا نظم عبد الرحيم غير مؤكدة لأن الاتنين طينة واحدة.
 قال إيه بقى رشدي بعد دخلة الكورال، قال لو عديت على ناس يقولوا لك حط حط حط حط يا إنسان.
طبعًا المشهور إن بعد الكورال ما يقول يسلم ترابها الأسمراني إلى آخر الكلمات مالناش حبيبة غيرها تاني، بيقوم رشدي مغني مقطع لو عديت على ناس يقولوا لك مرحب مرحب يا إنسان. لكن رشدي بدأ بمقطع مختلف تماما وقال ناس يقولوا لك حط حط..




الناس اللي عاشت في الريف والصعيد يعرفوا أكتر مفعول كلمة حط حط، سواء في تربية الطيور أو تربية الإنسان، زي برضه حطحط عليه، بالبلدي خده تحت باطك وضمه، علشان يحس أنه مش لوحده. فكرة الحطحطة المحاوطة الاحتضان للشخص.
فكرة الكلمة نفسها بتوحي ببشر عندهم القدرة على الاحتواء لبعضهم، وتبيان لصفات كانت موجودة في مجتمعنا المصري ومع الأسف بتندثر في غفلة مننا، وحتى اللي ممكن يكون متوفرة لديه الصفات دي بيحاول الباقي أنهم ييسفهوا منها ويحولوها لمضامين للسذاجة والطيبة المبالغ فيها. أو يحطوها في تفسيرات تانية مالهاش أي أساس من الصحة المهم أنك تقتل الصفة دي وخلاص متعمد أو جات وياك بالبركة...




الاثنين، 25 ديسمبر 2017

ميدلي العفشة

ع الكرشة والفشة مش كنا فطرانين 
ليه تنسى بالمرة المخ والمصارين
نسيت خلاص شغتنا نسيت طحال نينه
ونسيت كمان دهننا السايح على جبينك
كوز قلبي فيك غير كده ليه تنسى بسمينه
يهون عليك كبدنا شوحنا وشوينا
ع الكرشة والفشة مش كنا فطرانين
ليه تنسى بالمرة المخ والمصارين
ديل العكاوي مقطع مساوي 
اسلق وغدينا 
يسلق جواهر الراس معاهم
يسلخ ويدبح 
في كل مدبح
ويدور يشفي للناس منابهم
بيت الكلاوي شفي يا غاوي الكلوة في رغيفين الكلوة في رغيفن


وكان هذا من وحي مزج أغنية على الحلوة والمرة لسيد مرسي وأغنية لما رمتنا العين لأبو السعود الإبياري وطبعًا اللحنين لمحمود الشريف ._.

الأربعاء، 15 نوفمبر 2017

شربت من نيلها عادي

لما شوفت تريند النهارده حوالين عجن شيرين المعتاد والشرب من النيل، واللي عمالين يتكلموا أيوه هنشرب من النيل وبلا بلا بلا، وهما لا داقوا منه ولا نيلة بس ربنا يكفيكم شر فتحة الصدر! افتكرت عم عبد الوهاب الله يرحمه والصندل والمحلبة وأني كنت بركب الصندل رايح جاي بشلن (خمسة قروش).
الصندل أو المعدية غرفة كبيرة تشبه المركب مصنوعة من الصاج والحديد بتعدي بين بلدين بيفصل بينهم مجرى مائي/نهر. كان لونه لبني وأحيانا أزرق على حسب مزاج عم عبد الوهاب، وكان عبارة عن غرفة متعرشة بسقف صاج وفيها شباك وتحته الدفة اللي بتحدد اتجاه الصندل من خلال رفرف تحت في المياه ودراع الدفة، وده كان قليل استخدامه يعني لو الجنزير اتقطع أو تيار المياه شديد. ودكة لوحين خشب بست قواعد حديد بطول الغرفة وفي مقابل الدكة قعدة وفرشة عم عبد الوهاب والمنقد بتاعه وعدة الشاي وأسياخ حديد وشبك قديم وراه وطوق أبيض متعلق على الحيطة، وكليم صوف على الأرض، وساحة أكبر من الغرفة بيفصل بينها وبين الغرفة أرج على اليمين والشمال العمدان مواسير حديد نص فوق مكشوف ونص تحت معمول بالصاج. الساحة المكشوفة كانت زي صالة كبيرة متسورة بسور مكشوف من مواسير حديد والبوابات من غير باب لأنها كانت عبارة عن رفرف في كل فتحة باب بيتفرد ومربوط بجنزير يشبه بوابات القلاع في الأفلام الأجنبية اللي بتتفتح وتتقفل، وفي ركن الصالة موجود عامود وتد كبير متعلق فيه جنزير كبير بيربط بين البلدين مدقوق الجنزير في الأرض على البر، وكان الصندل بيتحرك من خلال قوة شد الجنزير، ياما شديته وأنا طفلة لوحدي وكنت ببقى مبسوطة رغم المياه والشحم ونباتات بحرية كانت بتتعلق في الجنزير. عم عبد الوهاب المفروض أن جزء من مهمته يشد هو الجنزير لكن كان الله يرحمه بمزاجه وظربون ممكن يقعد يطنش اللي راكبين اللي عاوز يشد يشد.
الصندل كان بيربط بين بلدي الأم (عزبة الأقطش) وبلد في البر التاني بيفصلهم النيل، وكانت أجرته رايح جاي من وقت ما وعيت عليه لحد ما اتشال واتبنى كوبري للربط، شلن رايح جاي ثم بريزة رايح جاي لحد ما بقى ربع جنيه في اخر مرة ركبته، وأعتقد فضل نفس الرقم ده فترة قبل ما يتكهن.
الصندل كان عليه مراكبي اسمه عم عبد الوهاب، وكان للصندل مواعيد رسمية واللي يفوته ميعاد بالليل أو يروح البر التاني من غير ما ينبهه تبقى ليلته بيضاء يا ينادي على مراكبي يعديه يا يضطر يلف بلدين علشان يروح، الصندل كان تبع المجلس المحلي للقريتين.
عم عبد الوهاب على حسب ما كنت أسمع أنه مراكبي في الأصل يعني النيل بيته وبقى مسئول عن الصندل، أعتقد أنه توفى عند سن 85 ويمكن أكتر. في الشباك اللي جوه عنده كان حاطط محلبة والمحلبة عبارة عن قلة مياه من الفخار الأحمر، لكن منفوخة ولها ودن أو ودنين، يعني تشبه البلاص بس على أصغر وفوهتها واسعة عن القلة العادية كان بيشرب منها واللي بيركبوا الصندل لو عطشوا بيشربوا، كان عم عبد الوهاب بيملاها من النيل ^_______^ لكن كان له تكنيك معين في ملوها وهو أنه بيوقف الصندل في نقطة معينة وسط النيل ويعلق ودن المحلبة بسيخ حديد متني اخره ويغطس المحلبة وهوب يرفعها تكون اتملت ويشرب، في مرة كنت عطشانة جدا وفعلا شربت من المحلبة وكان لسه ماليها كنت في سن 7سنين تقريبًا وقتها فعليًا ماكنتش عارفة مصدر المياه غير بعد ما شربت المياه كانت نضيفة فعلًا ولا طعم ولا لون ولا ريحة -ذاكرتي في مثل هذه الأمور كويسة-.
في مرة سألته يعني أنت إزاي بتشرب من البحر ده مش مضمون، فوراني يومها بيملاها إزاي وقال "قلب البحر نضيف بس (شتيمة ما ينفعش تتقال الله يرحمه لسانه كان شتيمة برضه ما ينفعش تتقال) يبطلوا غسيل ورمي زبالة، وأنا أكيد مش هشرب زبالة يعني".

بالمناسبة البلهارسيا مابتنتقلش من الشرب. وفي الوقت ده فاكرة كويس غفر المسطحات كانوا رايحين جايين بلانشاتهم الرمادي لمراقبة نضافة المياه ومخالفات وزعيق للغسيل والزبالة وأحيانا غرامات وكان في تحليل للمياه بصورة دورية وكان وكان وكان...

الخميس، 2 نوفمبر 2017

دبور البلح يشرب من صنبور كنيسة مارجرجس

دبور البلح يشرب من صنبور كنيسة مارجرجس

دبور البلح/ الدبور الأحمر/ الدبور الشرقي/ عدو النحل
يشرب من فتحة صنبور/حنفية موجودة بساحة كنيسة مارجرجس بمنطقة مجمع الأديان - مصر القديمة.
ت
صويري
sam j2
الساعة 3:20 عصرًا
يوم السبت
28 أكتوبر 2017







 
قُطُوُف - Blogger Templates, - by Templates para novo blogger Displayed on lasik Singapore eye clinic.