جمل التمني بالنفي في العامية المصرية

إن شا الله ما أشتهيك.
مانجيلكوش في حاجة وحشة، نجيلكم في الفرح.
ماحدش يعزيكم وردها لا احنا ولا أنتم.
جمل النفي المصرية، وتعبيرات الود العامية الريفية...

دومًا تمثل لي الصيغ الريفية باب تأمل وحيرة، فكيف تنفي ما تتمناه.
الأولى
إن شا الله ما أشتهيك أبدًا، بتتقال في سياق تمني عدم الفقد أو الفراق، وإن ما تجيش فرصة وأقول ياريتك كنت جنبي وأنك تجيب لي الحاجة قبل ما أتمناهاوأطلبها. وعلى حد ظني أنها بتتقال دومًا لأفراد الأهل أو الأشخاص الأعزاء.
الاشتهاء من باب الرغبة فيهم دومًا جنبهم، ودي صيغة من صيغ التمني بالنفي في الدارجة المصرية.

الثانية والثالثة
تمني عدم حدوث مكروه أو ضرر ورغبة في تبادل الزيارات دائما في الأفراح، وعادة تقال في مناسبات العزاء والمرض.

حجاج عبد الرحمن

"رمشك غمز قلبي صحى الهوى فيَّ زقزق في عيني الشوق ضحك الهنا ليًَّ"
في أغنية على سهوة لعمر فتحي.
جملتها الموسيقية، هي نفس الجملة الموسيقية للمقطع التراثي الشهير "يونس خطر في السوق ولد الهلالية سلم على التجار ردوا له التحية" اللي غناه عتاولة الفن الشعبي في مصر زي الست خضرة محمد خضر، وغيرها من المداحين ومغنيين السيرة الهلالية، وده إن دل على شيء فهو إن التراث الشعبي في الموسيقى والغناء ثري لدرجة أن حرف منه يسوي البدع.
جدير بالذكر إن ملحن على سهوة هو الملحن حجاج عبد الرحمن صاحب أشهر أغاني طرقعت وعملت صدى في التمانينات كأغنيات شبابية مسمعة على رأسهم ميال ميال لعمرو دياب. اللطيف إن حجاج عبد الرحمن لما لحن لعمر فتحي لازم في كل أغنية يحط جملة موسيقية مقتبسة من التراث الشعبي المصري، زي أغنية على إيدك اتعلمنا، اللي عملها من موسيقى شمال شرق مصر من منطقة مدن القناة، وموسيقى السمسمية واضحة وجلية في الأغنية ويمكن ده خلق لأغاني عمر فتحي شخصية متميزة. وفعلًا لو جينا نركب الأغنية على لحن تاني مش هيطلع أبدًا بحلاوة اللحن اللي عمله حجاج الله يرحمه... 

عمر فتحي - على سهوة 
 


خضرة محمد خضر - ولد الهلالية 



 عمر فتحي - على إيدك اتعلمنا 

ليل يا أبو الليالي

الله ليل يا أبو الليالي من أحلى أهازيج التراث اللي بتجمع النوبي على السواحلي على الصعيدي ❤️

من المفروض إن لحن ليل يا أبو الليالي بيجمع عدة صقفات متكررة متتالية كجزء من الأداء الموسيقي للأغنية والصقفة دي هي اللي بتميز تراث الغناء البحري على طول ساحل جبال البحر الأحمر بداية من منطقة القناة مرورا بالصعيد حتى أعالي النوبة في مصر والسودان. واللي بتشمل أغاني السمسمية وأغاني الكف وأغاني النوبة. هنا مثلًا الريس متقال وأخوه شمندي

https://www.youtube.com/watch?v=KQpDnWNBehg …

جامع بين الربابة كضلع أساسي في الموسيقى الصعيدي وهي وتريات من نفس الأسرة الكبيرة اللي منها السمسمية مع الإيقاع في الطبلة والصقفة

أما البحر أبو جريشة نقلها نقلة تانية وهو أنه يشغلها في موسيقى النفخ من خلال فن الجاز وللعلم لو اتقال يا جاز في مصر لازم يتحط اسم البحر أبو جريشة كعلم من أعلام الجاز عندنا

https://www.youtube.com/watch?v=iKnkjncyut4 …

ورغم أنه حطها في موضع غير الصعيدي والنوبي والسواحلي لكنها فضلت محتفظة بنفس قوامها الموسيقي وإيحاء الصقفة لازم بشكل تلقائي تحس به كمستمع.

أما محمد هلال كموزع موسيقي ويمكن الأب الروحي من (وجهة نظري) في شغله لحميد الشاعري وهنلاقي هنا محمد هلال عامل توزيع قريب للنغم الليبي

https://www.youtube.com/watch?v=kKQKVQp4Ijw

يعني أخدنا لسكة تانية خالص بعيد عن بيئة الأغنية ولكنها فضلت متماسكة وكلحن أصيل منتشر في الصعيد ماكانش ينفع ما نسمعوش بصوت الريس حشمت متقال واللي مع الأسف تم نسبه للفنان عمر الجيزاوي وهي مش أغنيته ولا حتى صوته ده صوت حشمت متقال...

https://www.youtube.com/watch?v=PAhOedChpWw

تراث غناء الشعوب ورقصتي الحرب والصيد

التراث الغنائي للشعوب شيء عظيم جدًا رغم السف والسخرية اللي بيقابلها في الفترة الحالية على سبيل المثال المشهد اللي اشتهر من سنتين تلاتة لفيديو مجموعة من البدو بيستعدوا للصيد فغنوا بطريقة أشيع عنها هبل وتأخر وبلا بلا بلا....
الغناء جزء ثقافي مهم لأي حضارة سواء ارتجالي ومنفرد أو حتى مصحوب بالموسيقى.
اللطيف في الفيديو ده هو محاولة تطويع الصوت والتحكم في الحنجرة من بره وجوه من خلال الضغط عليها وإطلاق أصوات أشبه بصوت النداء للحرب أو الصيد. وشبيه لرقصة الحرب (رقصة الهاكا) اللي انتشرت من فترة لفرح عريس وعروسة من نيوزيلندا.
 واللي لسه محتفظين برضه بتراثهم الغنائي ونمط الصوت نفسه مش لمجرد حرب أو غيره هم المنغوليين. في منغوليا طريقة غناء بتغيير نبرة الصوت وتراث فضل مخصص للرجال وبس نظرًا لترددات الصوت اللي بتطلع ومع ذلك من وقت للتاني ظهرت بنات من منغوليا بتغني زيها زي الرجل ويمكن أقوى، وعلى الجانب الطريقة دي في الغناء شديدة الصعوبة لدرجة ممكن تتخيلوا أنها DJ مش صوت بشري خالص.
القصد حافظوا على تراثكم وافتخروا به وما هواش مدعاة للسخرية أو التأفف أو محاولة الطمس علشان بقى ياي متخلفين! 

فيديو من أوتاوا بكندا هتلاقوه على صفحتهم في الـ Facebook 

Black Bear Singers @ Solstice 2016, Ottawa On.


مغني ذكر من منغوليا يغني ويعزف



مغنية أنثى من منغوليا وده صوت لمغنية أنثى صوتها طبيعي وعادي زي الفيديو اللي فوق لذكر منغولي ولكن وقت الغناء الصوت حاجة تانية خالص.



ودول مجموعة متنوعة لفرقة منغولية وبيوزعوا صوتهم زي ما سامعين 



ودي الهاكا الماورية 




وده الفرح اللي انتشر مؤخرًا




ودي العيالة الإماراتية



رقصة الحرب اليمنية

برج الحوت والغناء المصري

معروف عن لبنان، بخلاف أهلها وناسها وموقعها. إن عندها تراث غنائي دسم يمكن مسمع في كل الشرق الأوسط ومترابط مع فلكلور أو تراث الشام عمومًا.

في لبنان مدينة بعلبك، المدينة الأشهر بحفلاتها الغنائية والموسيقية من قديم الزمن، وده نتيجة لأن جزء كبير من تراثها أغانيها، وعلى رأسهم أغنية الهوارة وهي أغنية لا تمت بصلة لقبيلة هوارة الشهيرة. وبنلاقي إن أغلب الشوام عارفينها وتضاهي في شهرتها الدبكة اللبنانية وأحيانا يكملوا بعضهم ما بين غناء الهوارة ورقصة الدبكة...

في مطلع التسعينات عاد الصوت اللبناني من جديد لسوق الكاسيت المصري خاصة وسط انتشار واسع لأصوات شبابية مصرية. طل على المصريين صوت شاب لبناني استطاع أنه يحتل مساحة فيما بعد في سوق الكاسيت المصري على وجه الخصوص والسوق العربي عامة.

كان ظهور الشاب ده في سنة 1991م، يعني ما أحدثش ضجة كبيرة واتقال أنه ممكن يكون صوت عابر، لكن الصوت العابر اللي ما انتشرش في السوق المصري، عمل نقلة كبيرة في تاريخه سنة 1992 لما غنى أغنية "هور يا بو الهوارة" الشاب عاصي الحلاني اللي من مواليد بعلبك أخد جزء من تراثه البعلبكي اللبناني وطوعه على مقاس شباب العصر، وبدل في كلمات الهوارة وخلى مطلعها "هور يا بو الهوار هايدي الدنيا وأسرارها، قلب الشاب بيركض ركض والبنت بتمشي الغندارة...... إلى اخر الأغنية اللي بتقول الحوت بيقع بخسارة" 

وبكده عاصي الحلاني أول مغني يبدل في كلمات الهوارة الأصلية واللي غناها بعد كده لما نجمه سطع بالكلمات الأصلية واللي الهوارة فيها مستقلة بذاتها غير مرتبطة في أغلب الحفلات بالدبكة نظرا لدمجها ما بين الموال والموسيقى البسيطة.

ويعتبر عاصي الحلاني أول من غنى للأبراج الفلكية وذكر 12 برج فلكي بصفات محددة وختمها ببرج الحوت اللي مع الأسف وقع بخسارة. لكن في سنة 2017 يعني بعد 25 سنة من أغنية عاصي ومع عودة عمرو دياب بألبوم جديد في الصيف ربنا كرمه ونصف برج الحوت يلا الأخير ربه كريم ^_^ وبكده عمرو دياب أول مغني يغني لبرج الحوت وأول مطرب يغني لبرج فلكي...

ملحوظة ده مش تقييم للألبوم ولا يحزنون بس قلت أسبق قبل ما يقولوا أول واحد يدخل الأبراج في الأغاني وأقول لهم كلا البتة عاصي الحلاني سبقكم... يلا ع البركة

أغنية الهوارة الطويلة الحديثة نسبيا كغناء لعاصي الحلاني 

وأدي أغنية أجمل عيون الشهيرة ببرج الحوت لعمرو دياب 

بهجة الأكراد

في أمور جميلة بتحصل هنا، بداية بالجمع الكردي التركي السوري الجميل في الصوت والموسيقى، الطمبور الكردي الحاد الناعم وأصوات أينور دوغان (أكراد تركيا) وإبراهيم كيفو (أكراد سوريا، وبالتحديد هو خلطة أرمني كردي سوري مفتخرة) ومعهم كونشرتو (حوار موسيقي بين آلتين أو أكثر) بديع بين الدف الكردي -واللي مسكته لوحدها مش مجرد دق وبس محتاجة حرفنة- والدربوكة. وكلارينت ووتريات

نعومة الطمبور الكردي وسرعته وملاحقة الدربوكة والدف الكردي كما لو أنهم قطر سريع بيلاحقهم هويد نغم الكلارينت وهدهدته بتسحب المستمع لصوت بديع وفجأة الوتريات القاطعة لصوت السبق تنساب كالمطر (كمان، شيللو، كونترباص). 

يا ليلة ما جاني الغالي

الملحن عبد العظيم محمد الله يرحمه أبدع في وصف حالة المحبوب أو( الغائب-المسافر- الشخص الغالي) لما يجي للي بيحبه في موسيقى يا ليلة ما جاني الغالي ودق عليََّ الباب، لحن كله فرح. 


خاصة في مقدمة اللحن. والمستمع له بيشعر بحالة من الانبساط لسماعه، يمكن لوجود الطبل (البلدي) الصعيدي فيه، كخلفية واحدة مستمرة طول اللحن وهو بطبيعته عند الإنسان المصري باعث على الفرح ودموع الفرح والحنين برضه، وجرت العادة على أنه مُفرح ومبهج. على عكس السبس الصعيدي باعث للشجن والحزن، ويمكن السبس متميز ومميز عن المزمار في إن له هوية محددة لا يحيد عنها، الحزن والشجن والوجع والأنين. المزمار الصعيدي بين بين، يعني على حسب موضعه في اللحن وفي الغالب بيبعث بهجة خاصة في اقترانه مع رقص الخيل. ويمكن لأن عبد العظيم محمد أصوله من محافظة المنيا وهي نفس بلد عمار الشريعي -مع اختلاف مسقط الرأس- واللي لحن لشادية أغنية "إن كنت ليَّا وأنا ليك" وكان بنفس مدرسة عبد العظيم محمد في اللحن ده، أو إن تراث المنيا الموسيقي وضع بذرته وأثر في الشخصين!!!

أيوه عبد العظيم محمد هو ملحن الأغنية مش بليغ حمدي، وعبد العظيم محمد غير عبد العظيم عبد الحق. ويمكن المشترك بين التلاتة أنهم اشتغلوا مع محمد رشدي والأبنودي...

أهازيج الحج في مصر (أدوات الشرب)

مقتطفات من أدوات الشرب في تحنين الحجيج (متجدد على حسب الذاكرة، والبحث. أيهما أقرب.)

زغرطت له القلة وهي ملانة 

نشربك يا قلة نهار السلامة

زغرطت له القلة وهي جديدة 

نشربك يا قلة في مصر السعيدة

***

يا بير زمز سلبك حرير والشربة منك دوا للعليل

يا بير زمزم عتبك حرير والشربة منك غنا للفقير

يا بير زمزم سلبك سلاسل والشربة منك دوا للمسافر

يا بير زمزم عتبك حجارة ولشربة منك دوا للحيارى 

أهازيج الحج في مصر (وسائل النقل)

مقتطفات من تحنين الحجيج المرتبط بوسائل النقل
(متجدد على حسب الذاكرة، والبحث. أيهما أقرب.)

وإدونا الأمارة يا اللي زورتوا النبي إدونا الأمارة

إدونا الأمارة يا جمل يا أبو خف زينه

رايح فين يا جمل إدونا الأمارة يا أبو الخف زينه

رايح أودي حبيبي يزور نبينا وإدونا الأمارة

يا جمل يا جمل إذا جبت لي أحبابي أعلفك يا جمل بسمسم وجلابي

يا جمل يا جمل إذا جبتهم لي لأعلفك يا جمل على طرف كمي

يا جمل يا جمل إذا جبت سيدك لأعلفك يا جمل وأزود عليجك

هاتوا لها السلاسل هاتوها

هاتوا لها السلاسل الجمال هامت

هاتوا لها السلاسل غرضها تسافر

يمينك يمينك إن نويت يا حاجج
يمينك يمينك وبرك هجينك
يمينك شمالك وبرك جمالك

#تراث_مصر #الحج #تحنين_الحجيج #زفة_الحجاج

يا وابور النبي يا أبو أربع مراوح

هاموا الحجاج وقالوا على جدة رايح

يا وابور النبي يا أحمر يا عدسي

من يوم ما هويت النبي

صحاني من نعسي

يا وابور النبي يا أحمر يا دومي

من يوم ما هويت النبي صحاني من نومي

يا وابور النبي يا أبو دراع حديد

لأكنسك وأرشك يا واخد حبيبي

وإن جبت حبيبي لأكنسك وأرشك وبالشمع أقيدك

 وديني يا دليل وديني
ع النبي أشوفه بعيني 

النبي أهو عدى وفات
على منى وجبل عرفات

ربطوا الزكايب ع الوابور ربطوا الزكايب

أنا قمت عيني ع الوابور وبكت الحبايب

ربطوا الزكيبة ع الوابور ربطوا الزكيبة

وأنا قممت عيني ع الوابور بكت الحبيبة

#تراث_مصر #الحج #تحنين_الحجيج #زفة_الحجاج

يا ريس الباخرة مال الموج ميراري

ما تخافيش يا حاجة ده ريس أراري

يا ريس الباخرة مال الموج مضلم

ما تخافيش يا حاجة ده ريس معلم

يا وابور البحر يا أبو أربع مداخن

سلمك سلمك على مكة داخل

#تراث_مصر #الحج #تحنين_الحجيج #زفة_الحجاج 

عمولة يهودي جزمتك يا حاجج

لأجل مشي الجبال يا حاجج ودوس الدروبي

عمولة نصارى جزمتك يا حاجج 

لأجل مشي الجبال يا حاجج ودوس الحجارة

تحنين الحجيج

من التراث المصري، تراث تحنين الحجيج. يغنيه فنان الكف، جابر العزب من صعيد مصر...

يا فاطمة يا فاطمة يا بنت التهامي
افتحي البوابة يا فاطمة أبوكي دعاني
يا فاطمة يا فاطمة يا بنت الرسول
افتحي البوابة يا فاطمة حبايبك دعوني
يا نبي يا نبي ياما لك حبايب
هملوا عيالهم يا نبي وجولك غرايب
 يا نبي يا نبي ياما لك أحبة
هملوا عيالهم يا نبي وجولك محبة
هنيه لك يا حاج مكتوبة لك يا حاج
 مكتوبة لك حجة هنية تركب باخرة ومعدية
وحبايب جاتك بالمية هنية لك يا حاج
مكتوبة لك يا حاج مكتوب لك حج التهامي
 مكتوبة لك ع الباب قدامي
يا إخواتي ادعوا وعقبالي هنية لك يا حاج
 مكتوب لك حج الرسول
مكتوبة يالخيط اللولي
يا إخواتي عنده ادعوا
لي هنية يا لك يا حاج مكتوبة لك يا حاج
مكتوبة حجة نبينا مكتوبة وطه داعينا
يا إخواتي وعقبال باقينا
وهنية لك يا حاج مكتوبة لك يا حاج
عدينا يا مراكبي عدينا عند التهامي وودينا
ونزور عرفات وننول كرامات
عدينا نزور جد الحسنين ونزور مكة ونملي العين
نقف ع الباب عند الأحباب عدينا يا مراكبي عدينا
نزور نبينا الزين عند الروضة وعند الحرمين
 ونزور ونشوف بالكعبة نطوف عدينا يا مراكبي عدينا

جاتك نيلة - جاك نيلة

النيلة وهي اللفظ الأكثر شهرة في ربوع المجتمع المصري، دلالة على خيبة الأمل، القهرة أو النفور من شيء ما ، عبارة عن نبات أيوه النيلة نبات  ترجع أصوله لأشهر حضارتين في التاريخ، الحضارة المصرية والحضارة الهندية. لكن اللي فضلت أكثر شهرة هي النيلة الهندية نتيجة للنشاط النسيجي في دولة الهند واللي فضل جزء راسخ من تكوين المواطن الهندي في استثماراته حتى لو خرج بره الهند.. وانقطم وسطه عندنا في مصر بعدما كانت قلعة من قلاع النسيج في العالم...

نبات النيلة من فصيلة البقوليات / الفوليات (الفول، البسلة، اللوبيا، العدس إلى اخر قائمة البقوليات) وبيتم استخراج صبغة كالحة الزرقة أو الأزرق الغامق القريب من الكلحان، واللون اللبني الخفيف القريب من لون السماء.

النيلة كونت جزء من التراث المصري سواء على صعيد النسيج أو النحيب، في النسيج كانت من أقدم الصبغات اللي تعرف عليها المصري القديم ودخلت في صبغ منسوجاته خاصة ملابس الحزن والحداد، وهنا يجي دور النحيب فنلاقي ان المصري كان بيدهك وشه نيلة كدلالة على قهرة الموت زيها زي اللطم والعديد وفضلت العادة دي مستمرة لوقت قريب في القرى المصرية، على جانب الدلتا فضلت حتى أوائل السبعينيات، وفي قرى الصعيد فضلت حتى وقت متأخر جزء من مراسم الجنازة.

وتحولت النيلة فيما بعد لـ "زهرة الغسيل" الكيميائية واللي تكونت نتيجة خلط مجموعة من المعادن الكيميائية زي الفوسفات والنحاس، وطبعًا النيلة النباتية غير النيلة الكيميائية، طبقًا لاختلاف المكونات والأصل، لكن الثابت ان الزهرة حلت محل النيلة في طقوس العديد والموت، زد على ذلك استخدامها في الهروب من الجهادية "التجنيد" وده عن طريق وضع الزهرة الكيميائية في العين وقت الكشف الطبي والغشيم اللي تفوت منه ويبوظ عينه.

ومن هنا توسع وانتشر مصطلح جاك نيلة - جاتك نيلة - يجيك نيلة - ينيلك - اتنيل - بلا نيلة - اتنيلت.

 #محتوى_الصورة نبات النيلة الشبيه بنبات الفول وباقي البقوليات، الصورة على اليمين صورة مرسومة والصورة على اليسار صورة فوتوغرافية للنبات.

ملحوظة: السرد بمزج ما بين العامية والفصحى لأنه مجرد سرد عادي ^_^

يا هو

"هو" زخرفة نباتية بجوار البرج، قصر الأمير محمد علي محمد توفيق، منطقة المنيل، القاهرة.
تصويري.
السبت - 4/4/2015

إن خانقت جارك ابقيه وإن غسلت توبك (ثيابك-ملابسك) نقيه.

أعز أحبابنا!

ما يدوب إتيابنا (أثوابنا-ملابسنا) إلا أعز أحبابنا

في بلد في المنوفية اسمها فيشا الصغرى في شيء مميز فيها بخلاف المنازل العريقة اللي فيها، إن دور "جمع منزل، بلغة الريف" كتير فيها، محفور على شراعة بابها فوق تاريخ الإنشاء وفيها بيوت من 1800 لسه الباب بالشراعة موجود زي ما هو ده غير المقتبس من الانجيل من آيات وحفر أويمة لصلبان... ده تراث انساني مهم جدًا أتمنى ما يندفنش 

الأيام السوداء

يا مستكتر الأيام السودة جاية...

يقال لمن يبذر ويسرف في أمواله، كتنبيه أن هناك أيام بأس قادمة، مثل مثل القرش الأبيض ينفع في اليوم الأسود.

عيد ميلاد سيف وانلي

ولد سيف وانلي في يوم 31 مارس لعام 1906 بمدينة الإسكندرية 

وفي ذكرى ميلاده نذر يسير من ابداعه الذي تخطى الألف لوحة...

لوحة الحصان انتاج 1971 

لوحة لاعبتا التنس انتاج 1959 

لوحة الباليه الروسي 1967

لوحة موسيقى هادئة 1953

لوحة سيد درويش 

لوحة الأمومة 1957 

لوحة الرقص 

لوحة راقصات الباليه 1960 

لوحة الفنان في ورشته 

لوحة عازف الناي 1951 

لوحة الخوجه 

لوحة كرة القدم 

لوحة الخيول 

على هامش الفن الشعبي والدولة

خضرة لما غنت للسد العالي ولجمال عبد الناصر على "ميتى أشوفك يا قلبي اطمنت" ماكسرتش وزن الأهزوجة!!! لما قالت اللحن بالكلمات كامل 

حبيبي يا ولدي بحب بلدي وأهل بلدي

 يا أنا يا بلدي بلدي يا ولدي

 وطنك افديه واحميه وابنيه واقرأ له ماضيه

 تسلم له ولي يا أنا يا بلدي

 بلدي يا ولدي 

أميتى (متى) أشوفك يا قلبي اطمنت 

اه وحبيبي في اسنا اسنا وأنا بلدي أرمنت 

ده جالوا نخطب لك نخطب لك من آل المريس (قرية بالأقصر)

ولا جوم(قوم)بحر بحر على جرجا وبرديس 

جولت لهم كيف يا ناس وأنا رجل حسيس

 وأهلي وأعمامي وجرباتي (أقاربي) في أرمنت 

اه اه اه اه لالالالالالالالا اااااااااه لالالالالالالالالالالالالالا

 ااااااااااااااااااه لاالالالالالالالالالالالالا ولاه لالالالالالالالالالالالالالالا 

ميتى أشوفك يا جلبي مبسوط 

وحبيبي في دردا(جرجا) دردا وأنا بلدي أسيوط

 ااااااااااه 

ده جالوا ده ود مين ود مين 

أنا جولت ع تسأل ليه 

وأنا ابن أصل وأصلي ما يعلاش عليه 

وأنا شرفي غيرت عليه بلدي بلدي وعليه

 وأنا حلو في عينه عينه وأنا لابس زعبوط

اه اه اه اه

 ألالالا لالالا الالالالالا ااااااه لالالالالالالا ااااااه

وميتى أشوفك أشوفك يا جلبي فرحان

 ده حبيبي في الأقصر الأقصر وأنا بلدي أسوان....

فتدخل مع الأهزوجة بكل سلاسة وحسن ترتيب من نقلة الأقصر ثم أسوان وصولًا إلى "السد العالي" فتقول

جالوا لي ده السد العالي اللي بنوه العمال
 أنا جولت تعيش تعيش رجالنا الأبطال 
والفضل كله كله لرئيسنا جمال 
وبطل العروبة وزعيم العربان 

وفجأة تنقل من لحن للحن بكل سهولة وقامت لاضماه على لحن "وادحرج واجري يا رمان"

 وقالت "اه يا بطل الثورة يا جمال بالوحدة الكبرى يا جمال 
يا أبو عبد الناصر يا جمال...

لا نشزت ولا قطعت نفس ولا حتى قالت كلام تقيل ع الودن -حتى وإن كنا نختلف أو نتفق مع جمال- وده دايمًا كان حرفنة المداحين زمان!

كابوس ملون

شوفتوا وأطفالكم نايمين بيجرى لهم إيه ^_^ عو "مخطوطة تركية للكابوس من مخطوط مطالع السعادة وينابيع السيادة في علم الطلاسم سنة 1582" العيال تلعب مع العفاريت لو بالشكل ده...

الفقر والخلفة

من يوم جبتكم يا دلالة ما نمت مع أبوكم عريانة ولا كلت بصلة بورقها ولا خسة بعصبها #أمثال_مصرية 

بقر سمان يأكل بقر عجاف