خد مارشدير

امبارح وقع حظي مع سواق رخصته منتهية ولحظه إن في كمين, فيعمل ايه كلم سواق تاني طلع بفردة قبله من مدة -يوم الأحد بيكون العجل كتير بس الرجل قليلة- المهم صاحبه شار عليه يدخل من طريق مخفي النكتة انه دخل وهو مايعرفش الطريق ده أساسا ودخل في سكة غلط فأنا كنت راكبه في الكرسي اللي جنبه كل اللي ورا قاعدين مأنتخين وماحدش قال له رايح فين فقلت له أنت هتكمل على فين خد مارشدير واكسر شمال وحصل ورجع ... وبمنتهى البراءة بسأله هو أنت ما تعرفش السكة دي قال لي لأ 00 قلت له طب كمل كمل فضلنا ماشيين في الطريق وطبعا مافيهوش صريخ ابن يومين وكله مزارع قصب فهتنطخ يهني هتنطخ ... وكل شوية يبص لأي مخرج شمال ما يلاقيش غير مزارع ونيل ... وانا أقول له كمل لسه بدري فالملفت أنه كان بيبص لي بخوف وريبة كأن انا اللي خاطفاه بالعربية هو مين يخاف من مين يا عم أنت... فواحد م الميتين اللي ورا تفضل مشكورا وسأله انت منين يا أسطى فرد عليه بكل براءة أنا من هيت يا حاج... بصيت للسواق بكل ازبهلال وقلت في سري لما انت من هيت اخر بلاد المنوفيين جاي طريق ما تعرفوش الساعة واحدة بالليل تهبب ايه ... فأخد باله قمت مبرقه كمل لسه بدري...

السريحة

جرت العادة اني أكون من أواخر الناس اللي بتخرج من جامعة القاهرة وبحكم الوقت وفراغه في ناس صعب ان وشوشهم تتنسي من ضمنهم السريحة... والمعلم بتاعهم! شاب في أواخر العشرينات, ودول تخصص اللبان والمناديل وأحيانا قصص أطفال, الاختصاص له احترامه برضه. المهم كل يوم تقريبا بكون خارجة من الجامعة بالليل يكون موجود على المحطة وما بين 8:30 ل 9:00 بيكون ميعاد تجمعهم ووجبة الأكل بتاعته هو وتلاتة من عياله وبنتين شابة وبنت أعرف اسمها رحمة عرفتها من سنتين في المترو... وبقيت عارفة نوع الأكل يوم التلات مثلا الكشري فيه شبه مؤكد وبيكون المقعد اللي جنب الأسانسير مكانهم ومقر اجتماعهم في العادة,وعلى مرأى ومسمع للأمن الموجود على الرصيف اللي مالوش عازة وخيال مآتة... انما امبارح المنصرم من كم ساعة كانت 8:30 عبارة عن صريخ متواصل بصوت مبحوح للشابة المنتقبة اللي هي مجرد سريحة تابعة للمعلم, وهو ذات الشخص اللي نازل فيها ضرب ورزع في الحيط والكل واقف محلك سر وفي الوقت نفسه الأمن على الرصيفين انسحب وجري على فوق والضرب لسه شغال في الشابة واقذز الألفاظ والكل ركب المترو عادي وبكره هترجع كل حاجة لروتينها وفي ميعادهم هيسلموا الحصيلة وياكلوا مع معلمهم... بقول ده ليه مممم ولا حاجة من ضمن سلسلة الولا حاجة...