البردة

دائمًا احتفالات #المولد_النبوي في مصر كان لها طابع مميز، مثلًا في سنة 1977 م -تقريبًا- اتعملت بردة البوصيري في رحاب مسجد المرسي أبو العباس في الإسكندرية واللي بينه وبين مسجد ومقام الإمام البوصيري مسافة بسيطة، والساحة معروفة أنها ساحة المساجد. وشارك في الاحتفالية كوكبة من فناني وفنانات #مصر وحقيقي كان عرض مبهر جدًا وروحاني بشكل ممتع وكان مفعم بالحيوية ومتماسك ومنسق سواء في ترتيب الأدوار أو الزي. وغلب على الحفل طابع الفن الإسلامي بزخارفه ومنمنماته، وكان الغناء الفردي من أداء #علي_الحجار و #زينب_يونس والإلقاء الشعري من أداء مجموعة عظيمة على رأسهم عبد الوارث عسر ومحمد السبع وحمدي غيث ومنى قطان وميرفت الجندي وعبد الرحيم الزرقاني وسعيد صالح وغيرهم والإخراج المسرحي كان من إبداع #كرم_مطاوع والإخراج التلفزيوني كان #نور_الدمرداش لكن التأليف الموسيقى كان #يوسف_شوقي واللي هو نفس الشخص اللي صمم التأليف الموسيقي لعرض #نهج_البردة واللي ألفها #أحمد_شوقي وأقيمت في نفس المكان تقريبا لكن في الساحة بين المساجد في الإسكندرية ما بين المرسي والبوصيري والعرض كان يغلب عليه الطابع الشعبي في صوان الخيامية وهيئة الدفوف ودخول الكورال اللي يشبه دخول زفة المولد في الموروث الشعبي والزي في الحفل، وكان الحفل ده على رأسه الفنان زكي طليمات وأيضًا عبد الوارث عسر وكريمة مختار وسعد الغزاوي (الصوت الإذاعي المعروف) ومحمد ثروت وجلال الشرقاوي والصوت الرئيسي في الغناء كان #ياسمين_الخيام والإخراج المسرحي لمحمد توفيق، والتلفزيوني طبعًا نور الدمرداش
السؤال يا ترى بردة البوصيري اللي هتقام خلال الشهر ده في #مسقط هتكون مبهرة وفي مستوى متميز ولا لأ؟ أتمنى...

أمسية بردة الإمام البوصيري في مسجد المرسي أبا العباس بالإسكندرية عام 1977م 

أمسية نهج البردة لأحمد شوقي في ساحة المساجد بالإسكندرية 

موقف

على ذكر مادة الرسم، معروف عني من زمان أني موهوبة في الرسم ودايما الدرجات النهائية فيه أو أنقص درجتين بالكتير فلحد فترة الابتدائي كنا بناخد رسم وبس بلا معلومات ولا كتاب رسم الحصة نرسم فيها لحد ما دخلت أولى إعدادي وكان عندنا مدرسة رسم ##@#&@$& الله يسامحها المهم كانت تدخل الحصتين تشخط فينا وتحابي لمعارفها اللي هما ولاد مدرسين والست بصراحة كانت حامل وعلى اخرها فلا كانت بتعرفنا الامتحان شكله إيه ولا يحزنون وتسيبنا نهرجل وتيجي في اخر الترم تقول المقرر الدرس الفلاني بتاع الفنان فلان والمدرسة الفلانية طبعا بم أني بقرأ من صغري وبرسم فكتاب الرسم ده بالنسبة لي كان كنز وبالمناسبة لا زلت محتفظة به حتى الآن. فجينا لإمتحان الرسم ترم أول أول مرة أمتحن رسم في لجنة امتحان زي أي مادة عادي مش فارق معايا لأني كنت في أي امتحان لأي مادة من ابتدائي حتى الآن لازم أرسم بعد ما أخلص الإجابات على ورقة الأسئلة ^_^ وكانت الطامة الكبرى مكتوب "موضوع التعبير الفني: عبر بقلمك عن نهر النيل في تعبير فني" أفهم من أم الجملة إيه!!! أنه موضوع تعبير وكتبت عن نهر النيل والجلالة خدتني لحد ما جه مدرس ##@#^ٌ^$ منه لله برضه لأنه ماكانش بيقبلني شافني بكتب قال أبله فلانة هارية نفسها طول السنة وأنتم بهايم ما بتفهموش تعبير فني يعني تعبري ترسمي أنا زعلت على نفسي قوي مش علشان الغلط في الفهم لحاجة عمري ما أخدتها، مع العلم أني لحقت نفسي ورسمت وعملت موضوع محترم جدا منظور وتلوين وكله وبالمناسبة أخدت في الرسم سنتها 18 من 20 وكنت الوحيدة على مستوى المدرسة اللي تاخد الدرجة دي في الرسم... زعلت علشان الشخص ده شخط في وأخدت حقي منه لما قلت له الأبلة دي لا شرحت لنا ولا يحزنون وباقي اللجنة أكدت كلامي. مع الأسف الرسم والموسيقى والفنون عموما والزراعة والصيانة والرياضة مواد مهدر حقها في التعليم عندنا