الوشوش



وشوش

وشوش بترسم ع الزمن لحظة تاريخ

تبوح بسر الكون

بتهمس فى الودان همس الغريب وقت الخوف ،

تقول لإيد الزمن انقشى بدقة

افتحى شوارع للغريب وسط التوهة يقدر يخشه ،

يقدر يشد بطرف ايده بسمة أمل

بين الشفايف حبستها الوشوش،

جوه الوشوش صناديق

وكل صندوق فيه سر صاحبه وسر الزمن

 دفاتر بتنسخ من دفاتر لحظة قدر

تبان ع الوشوش بروح فارس بشوش

يطوف بمهره ع الخلايق
يمكن يحوش لحظة ندم!!!

 أو ضحكة صفرة من خبيث على وش بويه

بين شيش وشيش

نظرة وشوش خايفة من عيون ما بيختشوش

 من سر مطوى بين الصدور له شمس حق غايبة و بتعيب عليه الوشوش

 بين الوشوش تنهيدة قمر ، صبية فاتها قطر السفر

 ركنت على رصيف الحياة تنتظر

سمعت نبيح /شافت نظرة / خافت وكشت وسط الوشوش

لكنها كانت فاشوش!!!

جنازة مرت وسط حارات العدم

كفن يمر وشايله كفن

عيون بتروى حكاية وش اندفن

وجع وحزن خارج من ضلوعهم

أصله كان طيب بشوش

اسمه كان إنسان...

طافت جنازته من درب لدرب

فاتت على وش أبيض

عجوز وشارد باله وسط الخلايق

فى الملكوت...
فايته عليه طفلة بضفاير

بتحجل برجلها وتشوط هموم بكره

القلب رافع ع الوش

الأمل

راسم حياة شبه الهلال
م الخد للخد فدان

...