لولا الهوى

"لولا الهوى لم ترق دمعًا على طلل ولا أرقت" 
البوصيري

ميدلي العفشة

ع الكرشة والفشة مش كنا فطرانين 

ليه تنسى بالمرة المخ والمصارين

نسيت خلاص شغتنا نسيت طحال نينه

ونسيت كمان دهننا السايح على جبينك

كوز قلبي فيك غير كده ليه تنسى بسمينه

يهون عليك كبدنا شوحنا وشوينا

ع الكرشة والفشة مش كنا فطرانين

ليه تنسى بالمرة المخ والمصارين

ديل العكاوي مقطع مساوي 

اسلق وغدينا 

يسلق جواهر الراس معاهم

يسلخ ويدبح 

في كل مدبح

ويدور يشفي للناس منابهم

بيت الكلاوي شفي يا غاوي الكلوة في رغيفين الكلوة في رغيفن

وكان هذا من وحي مزج أغنية على الحلوة والمرة لسيد مرسي وأغنية لما رمتنا العين لأبو السعود الإبياري وطبعًا اللحنين لمحمود الشريف ._.

شربت من نيلها عادي

لما شوفت تريند النهارده حوالين عجن شيرين المعتاد والشرب من النيل، واللي عمالين يتكلموا أيوه هنشرب من النيل وبلا بلا بلا، وهما لا داقوا منه ولا نيلة بس ربنا يكفيكم شر فتحة الصدر! افتكرت عم عبد الوهاب الله يرحمه والصندل والمحلبة وأني كنت بركب الصندل رايح جاي بشلن (خمسة قروش).

الصندل أو المعدية غرفة كبيرة تشبه المركب مصنوعة من الصاج والحديد بتعدي بين بلدين بيفصل بينهم مجرى مائي/نهر. كان لونه لبني وأحيانا أزرق على حسب مزاج عم عبد الوهاب، وكان عبارة عن غرفة متعرشة بسقف صاج وفيها شباك وتحته الدفة اللي بتحدد اتجاه الصندل من خلال رفرف تحت في المياه ودراع الدفة، وده كان قليل استخدامه يعني لو الجنزير اتقطع أو تيار المياه شديد. ودكة لوحين خشب بست قواعد حديد بطول الغرفة وفي مقابل الدكة قعدة وفرشة عم عبد الوهاب والمنقد بتاعه وعدة الشاي وأسياخ حديد وشبك قديم وراه وطوق أبيض متعلق على الحيطة، وكليم صوف على الأرض، وساحة أكبر من الغرفة بيفصل بينها وبين الغرفة أرج على اليمين والشمال العمدان مواسير حديد نص فوق مكشوف ونص تحت معمول بالصاج. الساحة المكشوفة كانت زي صالة كبيرة متسورة بسور مكشوف من مواسير حديد والبوابات من غير باب لأنها كانت عبارة عن رفرف في كل فتحة باب بيتفرد ومربوط بجنزير يشبه بوابات القلاع في الأفلام الأجنبية اللي بتتفتح وتتقفل، وفي ركن الصالة موجود عامود وتد كبير متعلق فيه جنزير كبير بيربط بين البلدين مدقوق الجنزير في الأرض على البر، وكان الصندل بيتحرك من خلال قوة شد الجنزير، ياما شديته وأنا طفلة لوحدي وكنت ببقى مبسوطة رغم المياه والشحم ونباتات بحرية كانت بتتعلق في الجنزير. عم عبد الوهاب المفروض أن جزء من مهمته يشد هو الجنزير لكن كان الله يرحمه بمزاجه وظربون ممكن يقعد يطنش اللي راكبين اللي عاوز يشد يشد.

الصندل كان بيربط بين بلدي الأم (عزبة الأقطش) وبلد في البر التاني بيفصلهم النيل، وكانت أجرته رايح جاي من وقت ما وعيت عليه لحد ما اتشال واتبنى كوبري للربط، شلن رايح جاي ثم بريزة رايح جاي لحد ما بقى ربع جنيه في اخر مرة ركبته، وأعتقد فضل نفس الرقم ده فترة قبل ما يتكهن.

الصندل كان عليه مراكبي اسمه عم عبد الوهاب، وكان للصندل مواعيد رسمية واللي يفوته ميعاد بالليل أو يروح البر التاني من غير ما ينبهه تبقى ليلته بيضاء يا ينادي على مراكبي يعديه يا يضطر يلف بلدين علشان يروح، الصندل كان تبع المجلس المحلي للقريتين.

عم عبد الوهاب على حسب ما كنت أسمع أنه مراكبي في الأصل يعني النيل بيته وبقى مسئول عن الصندل، أعتقد أنه توفى عند سن 85 ويمكن أكتر. في الشباك اللي جوه عنده كان حاطط محلبة والمحلبة عبارة عن قلة مياه من الفخار الأحمر، لكن منفوخة ولها ودن أو ودنين، يعني تشبه البلاص بس على أصغر وفوهتها واسعة عن القلة العادية كان بيشرب منها واللي بيركبوا الصندل لو عطشوا بيشربوا، كان عم عبد الوهاب بيملاها من النيل ^_______^ لكن كان له تكنيك معين في ملوها وهو أنه بيوقف الصندل في نقطة معينة وسط النيل ويعلق ودن المحلبة بسيخ حديد متني اخره ويغطس المحلبة وهوب يرفعها تكون اتملت ويشرب، في مرة كنت عطشانة جدا وفعلا شربت من المحلبة وكان لسه ماليها كنت في سن 7سنين تقريبًا وقتها فعليًا ماكنتش عارفة مصدر المياه غير بعد ما شربت المياه كانت نضيفة فعلًا ولا طعم ولا لون ولا ريحة -ذاكرتي في مثل هذه الأمور كويسة-.

في مرة سألته يعني أنت إزاي بتشرب من البحر ده مش مضمون، فوراني يومها بيملاها إزاي وقال "قلب البحر نضيف بس (شتيمة ما ينفعش تتقال الله يرحمه لسانه كان شتيمة برضه ما ينفعش تتقال) يبطلوا غسيل ورمي زبالة، وأنا أكيد مش هشرب زبالة يعني".

بالمناسبة البلهارسيا مابتنتقلش من الشرب. وفي الوقت ده فاكرة كويس غفر المسطحات كانوا رايحين جايين بلانشاتهم الرمادي لمراقبة نضافة المياه ومخالفات وزعيق للغسيل والزبالة وأحيانا غرامات وكان في تحليل للمياه بصورة دورية وكان وكان وكان...

دبور البلح يشرب من صنبور كنيسة مارجرجس

دبور البلح/ الدبور الأحمر/ الدبور الشرقي/ عدو النحل
يشرب من فتحة صنبور/حنفية موجودة بساحة كنيسة مارجرجس بمنطقة مجمع الأديان - مصر القديمة.
تصويري
sam j2
الساعة 3:20 عصرًا
يوم السبت
28 أكتوبر 2017

حسن كامي

"غنيت عايدة 440 مرة"
هكذا يقولها وهو يشعر بالفخر أنه الأوبرالي المصري الذي غني أوبرا عايدة على مستوى العالم ما يقدر بـ 440 مرة.
هو حسن محمد علي كامي. له دومًا طلة ذهبية على الشاشة. وصوت مميز لا تختلف عليه أذن.
أول مصري يغني أوبرا عايدة في الاتحاد السوفيتي عام 1974 تحديدًا في مدينة فيلنيوس بليتوانيا وقتما كانت تتبع الاتحاد السوفيتي. #حسن_كامي (تينور) وليس (سوبرانو)، فالسوبرانو كلمة تطلق على مغنية الأوبرا الرئيسية، أما تينور تطلق على مغني الأوبرا الرجل.
ليس هذا وحسب بل طاف صعيد مصر بالأوبرا وفنونها! نعم فعلها كامي وترك القاهرة وذهب إلى الصعيد ليسمع الشعب الأوبرا دون قيد أو ملابس رسمية.
ولد حسن كامي في يوم 14 أكتوبر، وهذا غير الشائع خطأ أنه من مواليد 2 نوفمبر.
حياة حسن كامي الفنية غنية ويذكر فيها ومنها الكثير ولكن يحسب له هو والمخرج الراحل عبد المنعم كامل، حدث عظيم وحلم دفين لدى الموسيقار (فيردي) حينما نقلت أوبرا عايدة لأول مرة في منطقة الأهرامات في ثمانينات القرن الماضي. حيث يليق بها أن تصدح بصوت جلي وسط حاضنة من حاضنات التاريخ المصري القديم، أمام هرم خوفو والذي شهد اليوم واحد من الاكتشافات الهامة التي تبحث حول سر الهرم الأكبر.
فهل يفعلها كامي مجددًا وتفعلها الأوبرا المصرية، بإعادة الروح إلى أوبرا عايدة أمام الأهرامات؟
جدير بالذكر أن حسن كامي درس في مدارس الجيزويت الفرنسية بمصر، ثم التحق بكلية الحقوق جامعة القاهرة، ثم معهد الكونسرفتوار وأكمل الدراسات العليا في الصوت بإيطاليا والعلوم الموسيقية في الولايات المتحدة الأمريكية. لم يمل التعلم ولم يمل الغناء والتمثيل بحب، وكذلك شغفه بالقراءة داخل مكتبته العتيقة مكتبة (المستشرق) بوسط البلد... 

الحلو

هذا الحلو كاتلني يا عمه <3 br="">

هدية من هدايا سقارة (مكعب زجاجي)

هدية من هدايا سقارة (مكعب زجاجي)

بحب منطقة سقارة جدا وبحس بانتماء لها خاصة المنطقة الواصلة بين زوسر والسرابيوم.

في كل مرة سقارة بتديني هدية والمرة دي الهدية كانت مكعب لحجر زجاجي وسط الرمل وارد يكون مرمر ووارد يكون زبرجد، ووارد يكون مجرد انصهار رملي وسط أحجار جيرية متكلسة! مش مهم المهم إن سقارة بتهاديني في كل مرة.

مع الأسف اتخبط مني وضاع شكل المكعب المثالي...

بعد الكل ما طلع من السرابيوم وكالعادة أنا اخر شخص بيخرج لقيت المكعب بيناديني حرفيًا وقفت وسهمت من شدة جماله خاصة مع أشعة الشمس الشديدة وقلت شكرًا سقارة وأخدته...
الرحلة كانت مع مســــافر خانه

ظلمنا أنفسنا

يغدو الشعور بالندم أو محاولة الشعور به ترفا لا نناله عما فعلناه لا لشيء سوى لأمر واحد شديد القسوة وهو أن ما صدر لم يكن لأجلنا، بل لأناس غيرنا أهل! ربما أصحاب! مع الأسف وارد. 
للغير كان الفعل ولم يكن يوما لأجلنا. نفعل كل شيء نتلقى قسوته وحدنا ونتجرع مرارته وحدنا ونكتم آنين قاتل في الصدر ولا ندرك أننا نحتضر وحين نشعر بالندم يكون ترف لا نرقى له لأننا ظلمنا أنفسنا...

تألم في صمت

كل ما يحدث ينتزع منك الألم.
كل شيء يؤلمك
اصمت...لا تصرخ.
  اخرس لا تنطق بشيء
البوح بالألم عيب
إعلانك عن أوجاعك عار
اصرخ صراخ مكتوم
لا صوت لك... لا فم لك... لا حق لك
تألم في سرية فصوت الأوجاع مزعج للجميع.
دع نحيبك والبكاء يلتويان في أحشائك
دعهم يأكلونك وجبة دسمة طازجة
في مكمن أمعاؤك يرقد الحزن والألم
الألم ابن الحزن
أنجبه سفاحا من الظلم
أطعمه جسدك قطعة قطعة
القهر الابن الثاني لا يدخل جسدا إلا وافترسه.
احزن وتألم في صمت فالعالم مشغول ...

طفلة امرؤ القيس

في خضم حالة الرهاب اللي شغالة، افتكرت من كم سنة لما نزلت القصيدة المغناة دي جاني تعليق بيلقي على امرؤ القيس أنه بيتغزل في طفلة "بيدوفيليا"، وده أمر غير أخلاقي بالمرة خاصة مع ما تضمنته القصيدة من كلمات. المهم، وصل عن امرؤ القيس أنه كان بيحب امرأة تسمى (فاطمة بنت العبيد) وليست طفلة صغيرة، بل كانت امرأة بالغة. وكتب لها معلقة مخصوص باسمها ومطلعها "أفاطم مهلًا بعض هذا التدلل... إلى أخر المعلقة". طيب إيه الطفلة اللي طلال وهيام يونس وغالية وغيرهم بيغنوها دي؟!!!

على قدر روعة القصيدة لكن لم يحسن أحد ممن غناها النطق الصحيح.

"طَفْلة" هو النطق الصحيح بفتح الطاء وتسكين الفاء، أي المرأة الناعمة الرقيقة، امرأة أهية مش عيلة. وليس كما شاع النطق طِفلة أي الأنثى الصغيرة...

واللي تعامل مع التراب في الريف أو الصعيد عارف ملمس الطَفلة شديد النعومة لدرجة الذوبان في الإيد... يلا صباح الخير.