ليلة الوداع

"يوم نزاع ويوم وداع ويوم أقابل وجه كريم، ويبقى يومي دافي وكفني وافي" ستو سعاد
كان وردها اليومي وأمنيتها، طلبت كل أمر في الدعاء بصدق وتحقق وقتها...

وقتها فقط..

يومًا سأكون نزيلة بإحدى المصحات النفسية، وقتها ربما تأتون جماعات أو حتى فرادى لزيارتي، لحظتها سأرفض زيارتكم أو حتى رؤيتكم لي. ليس انعزالًا أو لاشتداد المرض... إنما احتقارًا

فرس النبي بتبيض

امبارح كان أول مرة أشوف بشكل مباشر فرس النبي وهي بتحط بيضها في الشرنقة الرغوية، لكن مع الأسف ما شوفتهاش وهي بتأكل رأس الذكر -الندل ما كانش موجود- اه فرس النبي بتأكل رأس جوزها بعد التكاثر ما هي ماترميش 300 بيضة وتقعد هفتانة يعني! 

الفراشة اتهورت مش اتطورت

معدية على عزاء فوجئت إن صوان الميتم تطور وبقي فيه شاشات عرض... مهنة الفراشة بتنفتح صوت وصورة
 أنا عمالة أضحك!! في كل زاوية فيه شاشاة lcd عارضة صورة المقرئ وتقريبًا كده العزاء متصور فيديو، مصائب قوم عند قوم مناظر
 بقول لك صوان، يعني في بلد ريفية تقول لي سرادق سيدات ^_^ السيدات بتعزي جوه البيت أو يفرشوا لهن حصير جنب البيت ويربعوا
 وكمان مافيش سيدات بتعزي في مادة، المادة في الوقت ده خاصة ربع العشا بيكون رجال بس، والسيدات أخرهم المغربية في بيت المتوفي
 سرادق في الأرياف يسمى "صوان" والصوان يسري على الأفراح والمآتم، أما الاسم الشائع للمآتم هي "مادة" والمادة تعني سرادق العزاء
 اللي فيه معزيين وفرش ومقرئ وقهوة وشاي داخلين خارجين وهكذا، الشكل الأساسي للمادة هو صوان خيامية وكراسي على الصفين وصفين ملاصقي  في نص الصوان، والصوان بيقام في حالة عدم وجود دوار للعائلة في البلد، أو بيكون تكملة للدوار في خارج المبنى لو المتوفي شخصية له
 حبايب كتير، وفي القرية ممكن يستغنوا عن كراسي الفراشة ويلموا دكك البلد بحالها يرصوها عند الدوار لو أهل الوفاة مقتصرين على
 التشييع وبعد العزا على المقابر وعند الدوار يقوموا واخدين دكك البلد حاطينها قصاد بيت المتوفي وعلى اخر الليل الشباب ترجع الدكك
تاني للبيوت، ولو عاملين "مادة" اللي هو صوان عزا سواء في دوار أو فراشة والناس اتسنجفت من المقرئ والمادة مطولة، يقول لك
 فلانة/فلان كانت مادته آخر عظمة شوفت الخلق اللي جت عزت ولا المقرئين....إلخ
 قال لك بقى المادة بتكون رجالة إنما الستات لهم عزا لوحدهم
 عزا الستات في الريف لحد فترة قريبة مختلف شوية، اختلافه كان في الست المقرئة اللي كانت بتيجي بعد فقرة الندابة تقعد تقرأ قرآن
 وعلى ذكر المقرئة كان في ست زماااااااااان بتيجي عندنا البلد في المآتم اسمها الشيخة عزيزة، كان صوتها حلو بصراحة وكان أغلب حضورها
للبلد في وفيات الإناث من البلد تقعد تقرأ في وسط الدار ما كانتش تقعد في الشارع أبدًا وكانت بعد ما تقرأ تقعد تقول أدعية وعليها
 شوية ذكر والستات ترد وراها لا إله إلا الله، وكان عزاء الستات مافيهوش كراسي أو حتى دكك بخلاف المادة اللي بيحضرها الرجالة، أهل
 بيت المتوفي أول ما السر الإلهي يطلع يفرشوا الأقيسة (جمع قياس وهو فرش على الأرض زي الحصير بس مش مصنوع من البلاستيك ده كان من خير الأرض مصنوع من الثُمار، وبصراحة البركة قلت من بعد ما انتشر البلاستيك) المهم القياس يتفرش والحصير البلاستيك يتفرش والسجاد والدكك والكنب والكراسي يتشال من جوه البيت علشان يوسعوا المكان ويتفرش بداله حصير وقياس علشان الهرس والدوس والستات تقعد عليه
 على الأرض وكل واحدة تيجي تواسي وتعزي واللي بتعرف تولول ما بتستناش عزومة، وكل بيت حواليهم يبعت حصيرة ويفرشها علشان تساع الستات
 خاصة لو في ستات غريبة هتيجي تعزي ما يصحش تقف لازم تقعد
 طبعًا الستات بتبدأ تتوافد وأغلب الدفن بيكون الضهر والدفن المتأخر إما وفاة جاية من القاهرة أو وفاة جاية من المستشفى، والرجالة
 واقفة بره خالص عند المسجد وعند الدوار منتظرين الجثة، سواء في بيتها أو جاية من المستشفى وقبل آذان الضهر بربع ساعة بيروحوا
 مجهزين النعش وياخدوا الجثة من البيت بعد ما تكون اتغسلت ويوروحوا بها على المسجد طبعًا في خروج النعش من البيت الستات تفتح على

  الرابع من عياط وصوات لحد ما يتصلى على المتوفي وياخدوه على التُرب ولازم يكون طريق اليمين حتى لو متصلي عليه في مسجد في اخر البلد

 ويرافق المشهد ستات من أهل المتوفي بس دول بيسبقوا يروحوا على الترب قبل الرجالة نادرًا لوطلعت ستات وراهم في الغالب بيروحوا قبل

الصلاة يلقوا نظرة الوداع ويرجعوا بعد الدفنة، طبعًا زمان كانت الستات بتدهن وشها نيلة "زهرة" وأحيانًا "تراب محماه" اللي هو

 التراب الناتج عن حرق القش في فرن الخبيز كنوع من القهرة والحزن ودي وراثة مصرية قديمة جدًا وفضلت مستمرة شوية لوقت قريب، ويمكن

 أنا في وقت ربط بينها وبين دهن زجاج النوافذ وقت النكسة باللون الزرق مش بس لأنه هيمنع ظهور الضوء لكن برضه قهرة وحزن جذورها

 مرتبطة بأصول مصرية قديمة، المهم رجعت الستات للبيت وبدأ الرجالة تقف تاخد العزا على الجبانة علشان الناس اللي وراها شغل ولازم تمشي وهترجع بالليل تكمل العزا في المادة، وده طبعًا ما يصحش لازم تيجي وتاكل عيب كده في وشنا. طبعًا في ظل اللي حاصل من دفن وصلاة 

بيتكون ستات البلد خاصة اللي من العائلة بتاعت المتوفي -مش أسرته- إنما العائلة (العزوة، العائلة الكبيرة يعني) بيكونوا جهزوا

 صواني الأكل، وصينية الأكل مالهاش أي مسمى غير أنها صينية الأكل والصينية دي في الوفاة بتتقال صينية أكل، وفي الفرح بتتقال عليها صينية العشا واتاخد الاسم ده عليها على طول حتى لو نزلت باب الشعرية أو أي بلد في الريف وسألتهم عن الصينية الألمونيوم الكبيرة قوي دي اسمها ايه هيقول صينية عشا، بتكون جهزت الصواني دي وسبقت الرجالة على الدوار، وراحت على بيت الميت صواني علشان الستات الغريبة و القريبة، لحد ما يطلعوا من التُرب ويجيوا، بتكون إيه مكونات الصينية بقى ودي حدوته هي كمان. صينية الأكل في العزا والمياتم بتتكون من دورق مياه (شفشق) وطبعًا لازم يكون زجاج وعيب عيب عيب يكون بلاستيك البلاستيك عند الريف حاجة قرف لكن مع الأسف بقى منتشر خلاص، المهم كوباية مع الدورق والصينية لازم تتغطى ببشكير أبيض وعيب عيب عيب يتغطى بجورنال ومع الأسف برضه بقى في ناس بقت تغطي بجورنال وده في عُرف العائلات الكبيرة قرف وقلة قيمة، نيجي بقى للأكل، المياتم لها أكل مميز جدًا، رز أبيض، لوبيا ناشفة، أو فاصوليا بيضاء ناشفة، أو بطاطس مطبوخة، وسلاطة خضرا، ولحمة مسلوقة، وعيش قمح. واللي ما طبخش وعاوز يبعت صينية ممكن يحمر بطاطس ومعاها حتتين جبنة قريش وجبنة قديمة وبيض برشت وعيش قمح وده نادر أما بيحصل أصلًا لأن أغلب الأكل بيكون طبيخ بس الجودة بالموجودة، والأكل بكده يكون خالي من مظاهر البهجة. بعد ما بيأكلوا بيمشوا ويرجع ناس منهم وقت العصر، يلحقوا الربع بتاع العصر، والربع ده بيُقرأ فيه قرآن في المادة بتاعت العزا ويريح المقرئ شوية ويبدأ ربع المغرب، ويريح ويبدأ ربع العشاء، طبعًا المعزيين رايحين جايين، من الرجالة على الدوار وعلى صوان العزا، إنما الستات بيكون العزا زي ما ذكرت في الأول عند بيت المتوفي وبيمشوا بعد العشاء برضه بس بيكونوا رايحين جايين يعني مش ثابتين هما هما من وقت الصبح، وفي سات بتطوع تطبخ غدا وعشا وتبعته صواني على بيت المتوفي...

دي سردية بسيطة على هامش المآتم في الريف

 

بالأمس كان يبحث عني ويلاحقني جميع المرضى النفسيون، اليوم صرت أنا من يبحث عنهم...

China Rose

هيبسكسص

هايسبوسكا

 Hibiscus rosa

تصويري

samsung pl 120

مشتلنا

3/5/2012

اللون الدهبي/الأصفر نادر ما شوفتوش غير عندنا تقريبًا!

مشهد يلخص كل المشهد...

مشهد بيلخص كل المشهد...
مصرعمالة تصرخ ليه بتضيع شبابك يا حسن ليه يا ولدي؟!!! قولوا لي يا ولاد، ليه يضيع شبابه؟
نعيمة جزء من الشعب اللي كان مبسوط من اللي بيغير بس كلمة كفاية بقى سابقة أمانيه...
بوسي الجزء اللي كان نفسه قصير، آمن وسلم ولما قال مافيش فايدة وما استحملش فبقى خلاص يلا نفوتهم ونفوتها لهم...
مريم الجزء اللي فضل يدور ويدور علشان يأتيه يقين الإيمان ويسلم أنه في تغيير، بس يمسك الحقيقة، ويفك التوهة...
العِمامة وأصحاب المال والنفوذ واقفين بيتفرجوا هما الاتنين أول من رأى وأول من مشي...
وعبد الله... عبد الله واقف ومتحمل
حسن وهو بيتلي كلام عبد الرحيم منصور، "بتعيشي وهم كبير حواليكي بيغنوا فوارس فوق ضهور الخيل ومخبيين السناكي في جراب القلب ومخبيين الغناوي في جراب الليل أنا جيتلك وأنا ماشي على كتفي حمل تقيل، لو كان جمل كان عض بنايبه الخذان " أكاد أجزم إن عاطف الطيب كان مقضيها بكاء...

شجرة الكافور

كم عمر شجرة الكافور؟
وكم من عاشقين ضُبطا متلبسين
بعطر زهرها؟
في قريتي، شجرة الكافور عطرًا ومِبخرةً وصمغ كتاب.
ضلًا يهدهده النسيم
في قريتي، زُرِعَ الكافور في كل مكان.
شاهق كالثريا
مألوف كالثرى
يضمد جُرح كتاب.
أو يلضم سطرين من العشق
في قلب سلسلة من المعدن الرديء
أحضرها بِكرٍ لبٍكر، من مولد بلا ذِكر.
انظر هاهنا نقشٌ لحرفين متلعثمين
بلغة لا تقرأها أرض الكافور
لكنها تفهمها
إفرنجية المنشأ ربيبة الهوى
غَرسٌ في لحاء الكافور
كجلد أحرقته نار الصبابة
ولم يلتئم.
حرفان لبدء اسمان.
رمزان لقصة عشق
وحده شجر الكافور يشهد
مراسم البدء
وينتظر....فلا يأتيان.

كُتبت في 17نوفمبر 2015 الساعة 11:30 صباحًا في أتوبيس وسط الدلتا العطلان ^_^
أي اقتباس بدون ذكر المصدر يا ويلك يا سواد ليلك، مش هقعد ألم عيالي من كل منتدى شوية ب_ب

لحظة من فضلك

#همسة_في_أذنك عزيزي الزوج لما يكون عيد ميلاد مراتك وربنا أكرمك والزهايمر مشي وافتكرته أو الولا مارك بتاع الفيس بؤ فكرك به ما تجيبش سيرة أسرة أو سيرة أولاد، زوجتك في اليوم ده بيكون مناسبة خاصة بها هي قبل ما تنخبط في دماغها وتتجوزك أو تاخد البوكس في وشها وتخلف لك العيال، غير في التهنئة مش لازم أنت وأسرتنا وبلا بلا بلا، حسسها أنها لسه كيان متفرد مش ساحب وراه هم الرجل والعيال والبيت والسوق والمدارس... إلخ

ويوم ما اتقابلنا قابلتك مسافر...
مركب في النيل والخلفية لبلاب وسنط وشجرة مانجة وبعض البيوت...
تصويري.
samsung PL120
11/11/2015

مسافر مسافر

"مسافر مسافر
ودايما مسافر
ومهما الطريق كان بعيد أو صعيب
مسافر بعمرك وأمرك عجيب
كأنك بطبع العناد سـندبـاد
وعاشق وعشقك بعيد البلاد
مسـافر تودي الوداد للرفاقة
مسافر تجيب الحليب للولاد"

حالي منذ البدء، والوِرد اليومي...

منة ورضا وأستاذ عبد الفتاح

طاقات الطاقات لطائف لطف تلطف...

تدوم نعمة الطاقة...

رباعية الفرح

طيب هي كده اتعشت، وممكن أنام مبتسمة بسبب إن الفيلم ده فضلت أنتظره وقت طويل من ساعة ما اتعرض مرة واحدة يتيمة من كم سنة على القناة الثقافية وقادتني إليه الصدفة النهارده!
شكرًا...

"آه يا إنسانُنا أدمتك أيدينا ودحر جناك في قبر عميق
ونسيناه فلم يسكب على جدرانه دمع صديق" محمد عفيفي مطر

تشويه القناطر الخيرية

القناطر الخيرية بمدينة القناطر الخيرية، وضع حجر الأساس لها محمد علي باشا وبنيت من حجارة أتت من محاجر طرة والبساتين، تدهن ببويه حمراء!!!

لا ندري هل هذه البويه تتبع وزارة الآثار أم اجتهاد من مجلس مدينة القناطر الخيرية؟!!! ألا يعد هذا تشويه للآثر وللحجارة التي بنيت منها القناطر وهل هذه البويه من ضمن المقرر به للحفاظ على الآثر من عوامل التعرية وفي الغالب لا...

لماذا هذا التشويه وهدر أموال على تشويه القناطر الخيرية بلون يشبه الميكروكروم في حين أن القمامة والعشوائيات لا زالت تحيط القناطر!!!

مرفق صور للتشويه الحالي وصورة للطائرات المصرية تمر أعلى القناطر وقت الحرب وصورة جوية قديمة للقناطر الخيرية...

نبتة تمسك نبتة

نبتة تمسك نبتة
تصويري
samsung pl 120
8 نوفمبر 2015 
طفلة تمسك ثمرة تين برشومي (أسباني)

أثر الفراشة

أثر الفراشة
تصويري
samsung PL120
8 نوفمبر 2015

#محتوى_الصورة فراشة ملونة على أغصان عود الغاب "البوص" على شاطئ النيل.

أم يوسف تحب الجرافيتي

صورة من على أحد حوائط عمارة تحكيم القطن في شبين الكوم، وهي أحد المباني العتيقة في المدينة... التقطها أثناء مروري بالمكان.

رسم جرافيتي باللون الأحمر "بحبك يا غالية كل يوم وأنتي طيبة أبو يوسف" طب ده يصح من أبو يوسف يا أم يوسف؟!!!

محاكاة هزلية لمدينة الله الأغسطينية

بعد جلبة ثم صمت صدح شكوكو ليبتنجان أبو خل ليبتنجان أبو خل، فرد عليه النادي القصب عاوز مياه يا واد، وفرح الجمنهور وروح بيته...

NanoEgypt

وكما قالت الست عفاف يلا بينا يلا يلا يلا يلا بينا "استعنا ع اللي بيوكلنا"

طوبى لكل المحبوسين باطل طوبة في وش كل اللي بيماطل

دعاء الكفاية

واكفينا شر المرمطة ببلاش

واكفينا شر الصاحب الغشاش

وقلوب قتيلة للوعود ببلاش

وعيون حزينة على ندر ما استوفاش

واكفينا جرح ناقصه ربطة شاش

من إيد حبيب ضاربنا سكة طناش

وعيدان حديد تقلب وابور قشاش

في أجازة عيد رايح الصعيد وماجاش

22-10-2015

رحيل

وترحلين مع اكتمال القمر. لا شيء يؤنس الصعود سوى زخات شهب، تتلقفها النجوم كي تتوج موكب الرحيل...

الخفة

لأن لا شيء أسوأ مما مضى سيأتي فكل ما يأتي سواء. فلنجعل الاستخفاف سمة والخفة طابع...

لا شيء يجلب السرور لا شيء...

السماء عتبات

14/2/2015
الساعة 5:30 مساءً
وقت الغروب
تصويري
البلد.

أهازيج الحج في مصر (أدوات الشرب)

مقتطفات من أدوات الشرب في تحنين الحجيج (متجدد على حسب الذاكرة، والبحث. أيهما أقرب.)

زغرطت له القلة وهي ملانة 

نشربك يا قلة نهار السلامة

زغرطت له القلة وهي جديدة 

نشربك يا قلة في مصر السعيدة

***

يا بير زمز سلبك حرير والشربة منك دوا للعليل

يا بير زمزم عتبك حرير والشربة منك غنا للفقير

يا بير زمزم سلبك سلاسل والشربة منك دوا للمسافر

يا بير زمزم عتبك حجارة ولشربة منك دوا للحيارى 

أهازيج الحج في مصر (وسائل النقل)

مقتطفات من تحنين الحجيج المرتبط بوسائل النقل
(متجدد على حسب الذاكرة، والبحث. أيهما أقرب.)

وإدونا الأمارة يا اللي زورتوا النبي إدونا الأمارة

إدونا الأمارة يا جمل يا أبو خف زينه

رايح فين يا جمل إدونا الأمارة يا أبو الخف زينه

رايح أودي حبيبي يزور نبينا وإدونا الأمارة

يا جمل يا جمل إذا جبت لي أحبابي أعلفك يا جمل بسمسم وجلابي

يا جمل يا جمل إذا جبتهم لي لأعلفك يا جمل على طرف كمي

يا جمل يا جمل إذا جبت سيدك لأعلفك يا جمل وأزود عليجك

هاتوا لها السلاسل هاتوها

هاتوا لها السلاسل الجمال هامت

هاتوا لها السلاسل غرضها تسافر

يمينك يمينك إن نويت يا حاجج
يمينك يمينك وبرك هجينك
يمينك شمالك وبرك جمالك

#تراث_مصر #الحج #تحنين_الحجيج #زفة_الحجاج

يا وابور النبي يا أبو أربع مراوح

هاموا الحجاج وقالوا على جدة رايح

يا وابور النبي يا أحمر يا عدسي

من يوم ما هويت النبي

صحاني من نعسي

يا وابور النبي يا أحمر يا دومي

من يوم ما هويت النبي صحاني من نومي

يا وابور النبي يا أبو دراع حديد

لأكنسك وأرشك يا واخد حبيبي

وإن جبت حبيبي لأكنسك وأرشك وبالشمع أقيدك

 وديني يا دليل وديني
ع النبي أشوفه بعيني 

النبي أهو عدى وفات
على منى وجبل عرفات

ربطوا الزكايب ع الوابور ربطوا الزكايب

أنا قمت عيني ع الوابور وبكت الحبايب

ربطوا الزكيبة ع الوابور ربطوا الزكيبة

وأنا قممت عيني ع الوابور بكت الحبيبة

#تراث_مصر #الحج #تحنين_الحجيج #زفة_الحجاج

يا ريس الباخرة مال الموج ميراري

ما تخافيش يا حاجة ده ريس أراري

يا ريس الباخرة مال الموج مضلم

ما تخافيش يا حاجة ده ريس معلم

يا وابور البحر يا أبو أربع مداخن

سلمك سلمك على مكة داخل

#تراث_مصر #الحج #تحنين_الحجيج #زفة_الحجاج 

عمولة يهودي جزمتك يا حاجج

لأجل مشي الجبال يا حاجج ودوس الدروبي

عمولة نصارى جزمتك يا حاجج 

لأجل مشي الجبال يا حاجج ودوس الحجارة

تحنين الحجيج

من التراث المصري، تراث تحنين الحجيج. يغنيه فنان الكف، جابر العزب من صعيد مصر...

يا فاطمة يا فاطمة يا بنت التهامي
افتحي البوابة يا فاطمة أبوكي دعاني
يا فاطمة يا فاطمة يا بنت الرسول
افتحي البوابة يا فاطمة حبايبك دعوني
يا نبي يا نبي ياما لك حبايب
هملوا عيالهم يا نبي وجولك غرايب
 يا نبي يا نبي ياما لك أحبة
هملوا عيالهم يا نبي وجولك محبة
هنيه لك يا حاج مكتوبة لك يا حاج
 مكتوبة لك حجة هنية تركب باخرة ومعدية
وحبايب جاتك بالمية هنية لك يا حاج
مكتوبة لك يا حاج مكتوب لك حج التهامي
 مكتوبة لك ع الباب قدامي
يا إخواتي ادعوا وعقبالي هنية لك يا حاج
 مكتوب لك حج الرسول
مكتوبة يالخيط اللولي
يا إخواتي عنده ادعوا
لي هنية يا لك يا حاج مكتوبة لك يا حاج
مكتوبة حجة نبينا مكتوبة وطه داعينا
يا إخواتي وعقبال باقينا
وهنية لك يا حاج مكتوبة لك يا حاج
عدينا يا مراكبي عدينا عند التهامي وودينا
ونزور عرفات وننول كرامات
عدينا نزور جد الحسنين ونزور مكة ونملي العين
نقف ع الباب عند الأحباب عدينا يا مراكبي عدينا
نزور نبينا الزين عند الروضة وعند الحرمين
 ونزور ونشوف بالكعبة نطوف عدينا يا مراكبي عدينا

طيف ضيف

صباح الخير
شيء من الموت يلاحقني هذا الصباح، لا أدري ماهيته. هل هي رائحته أو شعور بقدوم ذلك الضيف؟
لا أدري!
فلم يخبرني أحد من قبل عن رائحة الموت، ولا أعرف هل كان للموت غدد تطلق الروائح المميزة أم أنها محض هبة لا منبع ملموس لوجودها. جل ما في الأمر أن له حضور طازج اليوم، وعندي امتحان بعد قليل...

الرجل المعاصر أو المعصور أيهما أقرب!

death

"They are waiting to take us into the severed garden. You know how pale and wanton thrillful comes death in the strange hour?
Unannounced, unplanned for, like a scaring, over-friendly guest you've brought to bed.
Death make angels of us all, and gives us wings where we had shoulders smooth as ravens' claws.
No more money, no more fancy dress, this other kingdom seems the best.
Until its other jaw reveals incest, and loose obedience to a vegetable law.
I will not go. I prefer a feast of friends to the giant family.

براء

ذلك الطفل الذي صعد
ذلك الطفل الذي لم يخلع ثوب طفولته وأرقته الحياة
ذلك الطفل الذي رأيته، وعرفته من خلال حرفه
ذلك الطفل الذي كان له ما له...
 قد رحل!

عليِّ باب الأوضة يا واد يا بنا

البيوت المصرية زمان وخاصة في الريف كانت بتمتاز بموائمتها للوضع المناخي على حسب طبيعة الأرض المبني عليها البيت، فكان -ولا زال في بعض المناطق- المصري يبني داره من طينة الأرض اللي عايش عليها يعني شكل من أشكال الجهازالمناعي أنه يقاوم من مكوناته أي تغيير في الطقس.

علشان كده كان بيتقال الدار الطين في الشتا دفا وفي الصيف طراوة، لأن الطينة مادة بطبيعتها بتتعامل مع الطبيعة بأنها جزء منها ومش مصنعة بشكل كامل زي الطوب الأحمر مثلًا، ومسام الطينة بتشتغل مع الإنسان ولا أجدعها تكييف!

تحضير خامات الدار كانت كالتالي

* رطش أو رتش على حسب نطق المناطق الريفية وهو التراب اللي بيجي من الأرض الزراعية بعد ما بتكون أخدت الغذا بتاعها منه وبيكون ناشف جدًا على خلاف "السباخ" اللي بيكون طري حبتين والسباخ هو السماد الطبيعي اللي بينزل الأرض الزراعية علشان تتغذى منه وتأكل -الأرض والزرع زي البشر بيأكلوا وبيشربوا- المهم السباخ بيكون جاي من تفاعل الرطش/الرتش وفضلات المواشي / البهايم فبالتالي بيكون سماد طبيعي وطبعًا ما ينفعش يتبني به، فالبناء بيكون من رطش الأرض.

* تبن، والتبن بيكون منتوج ما تم فرمه من قش القمح بعد ما تم درس القمح في الدراسة (الآلة اللي بتقوم بفصل الحب عن القش) ولازم يكون قش قمح أو قش شعير أو كتان، أما قش الدرة لأ لأنه رائحته سيئة، المهم علشان ما نرغيش كتير التبن جزء من منظومة البناء.

* مياه بكمية تناسب المعجنة.

* قالب طوب / اسطمبة ودي بتكون مصنوعة من الخشب وعلى شكل مستطيل وله ضلع يزيد عن نصف طوله علشان يكون مقبض لخلع القالب من الطين والإمساك به.

والطريقة كالتالي بيتجاب الرطش في مساحة أرض واسعة علشان المعجنة تاخد راحتها، ويتحط على شكل دايرة مفرغة من النص ويترش عليها كمية مناسبة من التبن وبعدين تترش المياه وتتم المعجنة من خلال مجموعة من الأشخاص لو المعجنة كبيرة أو شخصين لو هي صغيرة وكل واحد يقف برجله ويفضل يغرز ويدوس جوه العجينة وتتساب لمدة كم يوم علشان تتخمر زيها زي عجينة العيش بس دي بتتساب لأيام وعلى حسب درجة الحرارة طبعًا، ولو المياه قلت تترش مياه عادي بس المهم أنها ما تبقاش روبه "شبه الجبنة الدوبل كريم كده يعني" علشان القالب يمسك في العجينة ما ترنخش "ترنخ يعني تسيب كده وتبقى شبه الممادة الرخوة" المهم المعجنة اتعجنت نيجي للتقريص بقى ^_^ ايه اللي بيحصل عارفين عجينة العيش والتقطيع للأرغفة هو ده اللي بيحصل ايه الللي بيحصل؟

بيجوا الناس راشين على الأرض كمية تبن زيها زي الردة اللي بتحطوها تحت العيش المهم نجيب القالب ونحطه ع الأرض المرشوشة تبن ونقوم مكورين كورة طينة من الممعجنة ونصبها جوه القالب ونساويه بس لازم يكون القالب مرشوش مياه والإيدين مبلوله مياه علشان ما تبقاش مكتلة كده، أيوه زي ما بتعملوا في عجينة العيش... نيجي بقى نخلع القالب هنلاقي العجينة أخدت شكل مستطيل وما ريحتش طبعًا لأنها اتعجنت صح واتخمرت بالمظبوط. طبعًا المسألة طويلة أنك تقعد تشكل العجينة في قالب علشان تعمل الكمية اللي أنت محتاجها، وبينساب الطوب في الخلاء ويترش عليه من فوق تبن ويفضل كم يوم في الشمس لحد ما ينشف تمام.

نيجي لوقت البناء بيتعجن عجينة شبه اللي فاتت وتتخمر كم ساعة بس، ويبدأ البنا يحفر عمق لقالب الطوب علشان يحط الأساسات والعواميد، والعواميد دي بتكون إما جزعين نخل مشقوقين، أو عودين بوص بامبو، أو عرقين خشب من شجرة كافور وأحيانًا ما بيتحطش ويكتفوا برص الطوب، يجي البنا يحط القالب ويليسه بالطينة المعجونة ويرص القالب اللي بعده، نفس العمملية بتاعت المباني اللي بالطوب الأحمر والأسمنت، بعد كده يعرش السقف، ويعرش هنا معناها يعمل سقف الدار ودي بتكون إما حصير بوص متخوصه أو قش دره، ودي بتتحط ما بين عرقين خشب أو عودين البامبو، ويتليسوا بالطين برضه، وبعد ما الدار تنشف شوية يقوم البنا جايب نفس المعجنة ويقوم داهك الدار بره وجوه بالطين ودي نفس عملية "الممحاراتي" بيمحر بس هنا بالطين، وتبقى دار عشرة على عشرة، وطبعًا لو أصحابها مقتدرين بيغفقوها "بيغفئوها" ويدهنوها بألوان الجير بره وجوه، وبدل ما تكون أرضية الدار أرض طينية عادية غير ممهدة فبيقوم أصحابها عاملينها "حُمرة" والحمرة دي عبارة عن نوع من أنواع الأسمنت وعليه مادة لونية حمراء ويبلطوا الأرض بها، أو كسرة طوب أحمر ومتدشدش "مطحون" وبكده بقت دار زي الفل.

طيب ايه وجه الاستفادة من ده كله؟ وجه الاستفادة أن طريقة البناء دي كانت بتخلي اللي قاعد جوه البيت لو الجو حر يلاقي تكييف هوا زي الفل جوه ورباني من غير لا كهربا ولا دياولوا وده نتيجة مسام الطين المعجون وتفاعل الطين مع الجو، ولو الدنيا برد البيت دي بيكون دفا بس مشكلته بتكون لو في مطرة شديدة والبيت مش متغفق طويس بيرطبه حبتين لكن لما الشمس بتطلع بيكون نشف، وطبعًا السقف ممتحبك فمافيش مشكلة الدار أمان. ويمكن دي نفس العمملية اللي الناس بتحسها لما تشرب من القلة في الصيف وتلاقيها باردة ومنعشة...

الصور الملحقة تصويري ومن بيتنا وعمره أزيد من 80 سنة، والقالب الخشبي شبيه لقالب صب الطوب.

أي ترجمة اسأل استشير...

*كتبت التدوينة للإجابة عن استفسار إحداهن على تويتر، والتدوينة مختصرة إلى حد ما...

Banista

جمال وروعة وفتنة النحت على الخشب!!!
التمثال اسمه Banista
 يعني المغتسلة أو اللي بتستحمى يعني واللي نحته اسمه
Luis Anibal Potosi
 من الإكوادور تحديدًا من سان أنطونيو...
والطريف إن النحات اسمه زي اسم ولاية مكسيكية، ويعتبر ماستر النحت على الخشب في الإكوادور 0.0

المنحوتة لا شك أنها فاتنة ومنحوتة بحرفنة، لكن عندنا في مصر نحت عظيم يوازي ده بيتعمل على خشب السرسوع في قرى كتير في مصر في الدلتا والصعيد، وفنانين مغمورين ماحدش يعرف عنهم حاجة!

النحات لويس بوتوسي اتولد سنة 1937 في سان أنطونيو دي إيبارا بالإكوادور، واتخرج من مدرسة الفنون سنة 1957، وقدر أنه يؤسس ورشة "استديو" في قريته يشتغل فيه النحت ويعلم تلامذته النحت على الخشب، وشاف أن ده نوع من أنواع الجذب السياحي للإكوادور، وكان عضو في لجان تحكيم عالمية لفن النحت على الخشب، وشاف أنه قدر يوصل فكرته للترويج السياحي وتنشيط فن النحت في الإكوادور...

ده لقاء قديم مع لويس 

 وده موقع عليه بعض أعماله 
http://luisanibal.artelista.com/en/

استريحي بتصرف

استريحي يا فيوم

استريحي ليس للبط بقية

انتهت كل مواسمه الوردية

فامسحي ريش المسكوفي

ولا تطبخي المولر يا صبية

واكشفي الحلة عما تحتها

من حنين واشتهاء وبطة محشية

كنت يومًا يا فيوم فتنة قدستها

كانت سواقيك يومًا ظمأ القلب وريه

لم يبق سوى حيرة حشو البط

كيف أقصيه من على النار

ولديه الرغبة في أن يحترق

كيف أدنيه من النهر؟

وفي ريشاته خوف الصيد وذكرى الغرق

أحببتك حقًا يا بط

ولكن لا أدري أنا أم أنت الضحية؟

أمل دنقل بتصرف أو بتشخرم أيهما أقرب، وليغفر لنا أمل عما بدر ويبدر منا، اللي فيه داء بقى ^_^

حياة

الحياة أقسى من أن نهدرها على اللاشيء، فهي مهدرة بطبيعة الحال...

عباد الشمس

"وكعادتها تستيقظ زهرة عبّاد الشمس
تتمطّى في كسل
فوق بساط العشب المعتم
تلوي العنق بعكس الريح
تتلفت، ظامئة، حائرة
مندهشة
تبحث عن ضوء الشمس
حتى تيأس، أو تنعس"
عدنان الصائغ

ليس كمن رأى رأى

الحمد لله على بقاء السر واليقين...
 وخفف الله من قدر وحشة المعرفة ورعبها المتكرر والمعتاد

أول حفيد

حفيد الحفيد يا سعاد... انبسطي في مكانك

دعاء ولدت

حفيد الحفيد يا سعاد، انبسطي في مكانك

اللي هيفضل مننا عايش واللي هيفضل من اللي هيفضل عايش عنده أمل في الخلفة واللي هيفضل من اللي هيفضل عايش واللي هيفضل منه يخلف عنده قدرة انجابية لأطفال أصحاء هيكون عنده فرصة ابن المحظوظة يحكي لأولاده عن المدعكة اللي احنا فيها وعن أقذر وأنتن شغل مخابراتي اتعرضت له المنطقة مع أغبى طرق تنفيذ، بس السؤال يا ترى العيال اللي هيتم انتاجها دي هيكون عندها شغف الحواديت؟

كروان البدرية

لقيته عمال يغني وواقف بزهو وافتخار، أسكت لا أصوره طبعًا...

خارجين من التاكسي

خارجين من التاكس كنا
وعادم السيارات في أبو الفداء
المواسير فكت من البيوت
وتهبط فوق الكوبري اللعين
بولاق أم العجوزة صاح بي التباع