أول سند ورقي في مصر والسودان

تصحيحًا وتعليقًا على أحد الــ Posts على الـ Facebook 

 كمبيالات غوردون صدرت في 1884م بعد قيام الثورة المهدية بثلاث سنوات (1881)، وأصدرها بعد حصار قواته وهزيمتها من قِبل جيش المهدي في (الخرطوم) السودان وعلى أثر ذلك لم يستطع سداد المستحقات المالية بسبب الحصار، وأصدر سند ورقي (عملة ورقية- كمبيالة-أذون خزانة) يحمل القيمة المدونة عليه ويتم صرفها من خزانة الخرطوم أو من خزانة مصر إن تمت النجاة والخروج من الخرطوم، وكتبت بالحبر الشيني بيد خطاط يسمى (فاضل) وتحمل ختم حكمدارية السودان وختم غوردون نفسه، وكانت خامة الورق من ألياف الكتان.  وكانت بالفعل أول تداول لعملة أو سند ورقي يعادل قيمة العملة المعدنية آنذاك سواء كانت ذهب أو فضة.
وللمعلومية قام محمد أحمد المهدي قائد الثورة المهدية على الحكم "التركي-المصري " بإصدار فرمان لإصدار عملة خاصة بدولته لا تحمل أي رمز عثماني أو مصري وتم التصديق على سك العملة النقدية في عام 1885م، وهو نفس العام الذي قتل فيه غوردون وأحكم المهدي وقواته السودان تحت سطوته.
أما بشأن البنك الأهلي فبعدما وافق الخديو عباس حلمي الثاني على إعطاء سوارس الإذن بإنشاء البنك الأهلي وقع أيضا على إصدار أذون سندات بقيمة الجنيه المصري آنذاك وكان في يونيو 1898م وإصدار الأمر بتعيين مدير ومندوبين للبنك وموظفين في أغسطس من نفس العام وهذا التاريخ 31أغسطس 1898م هو التأسيس القانوني للبنك وسنداته الورقية التي تحمل  كما نص نظامنامة البنك الأهلي.
وكانت من ضمن قوانينه أيضا، إصدار سندات مالية أو أسهم للمؤسسات المصرية أو السودانية على حد سواء...
أما عام 1899م هو عام توقيع اتفاقية الحكم الثنائي على السودان.

عبادي يا واد عبادي

عبادي* يا واد عبادي كرباجك ع الهجين واللي عايلعب بي أني يعيش عمره حزين سلم لي ع الست بهية اللي حبت ياسين وبهية في المحاكم شدت واحد وكيل واحكم يا جاضي النيابة جيدامك مظاليم #تراث_مصر 
يرمز هنا بالعبادي - وهي اللازمة أو التيمة الفلكلورية الأشهر وسط لازمات الغناء التراثي الشعبي خاصة الصعيدي في مصر - لياسين العبابدي بطل حكاية (ياسين وبهية) وهو من قبيلة "العبابدة" أشهر عرقيات البجا في مصر، وعلى طول ساحل البحر الأحمر،  ولربما قامت الدنيا عليه ولم تهدأ نظرًا لنسب "بهية" لقبيلة هوارة أشهر القبائل العربية في المنطقة...

 نختلف أو نتفق حول إن كان "ياسين" ذلك الرمز في الأصل مجرد لصًا ينهب خيرات الطريق، أو أنه "روبن هود" آخر مثله كمثل "أدهم الشرقاوي" وسيرة الأخذ من مال الغني الظالم وإطعام الفقير... لكن تظل الحكاية حكاية عشق "بين اثنين" وبطش قوة السلطة بها، كما أرخ لها الفنان الشعبي على طول مصر وعرضها بربابة كان أو بسمسمية أو حتى مرتجلًا يدندن كلمات حفظها عن ظهر قلب، هو الثابت في الحكاية... راوي يسري صوته قبل أن تتحرك قدماه من بقعة لأخرى.

وهنا حوار من ضمن حوارات تراثية ظلت كنقش على صدر الفنان الشعبي تتوارثها الأجيال تلو الأجيال، أكان هذا الفنان من الغجر كبنات مازن ومتقال وغيرهم أو حتى فنان من نسل العبابدة ذاتها! أو حتى إدخال اللازمة في أغنية أخرى مثل "عطشان يا صبايا" "ويا بهية وخبريني" وغيرها  من أغان تناولت قصة ياسين وبهية أو قصة ارتبطت بتاريخ العبابدة.

نجد هنا حوار سلس يجريه الراوي مع القطار الذي نقل الجثمان والمتهمين، والست بهية وهي تحاول نجدة زوجها، في حين أن الرواية التاريخية التابعة للسلطة تذكر أن بهية أنكرت حبها لياسين فور قتله وادعت أنه اختطفها واغتصبها، خشية أن يقتلها أهلها!!! فكيف هذا والرواية الشعبية تذكر ملحمة من الحب والوفاء بين بهية التي طافت المحاكم حتى لا يحكم القاضي على ياسين...

نعود ونذكر ونذكر أن الرواية الشعبية التاريخية خير وأبقى من رواية أية سلطة...

يا بابور الساعة اتناشر يا مجبل ع الصعيد 

عبادي يا واد عبادي كرباجك ع الهجين

واللي عايلعب بي أني يعيش عمره حزين

يا بابور الساعة اتناشر يا مجبل ع الصعيد

سلم لي ع الست بهية اللي حبت ياسين

يا بابور الساعة اتناشر يا أبو عجل حديد

خبريني يا بهية ع اللي جتل ياسين

جتلوه السود عينيه من فوج ضهر الهجين

ياسين غرجان في دمه غاب منه الباش حكيم

وبهية من المحاكم شدت واحد وكيل

واحكم يا جاضي النيابة جيدامك مظاليم

عوج (طنجر) الطربوش على ناحية حكم بأربع سنين

سنتين في الجصر العالي

سنتين في الزنازين

يا رب هات الفرج مهما العسير طول 

لابد عني الممات مهما الأجل طول

 لابد عني السفر مهما الغريب طول 

دورنا دورة علشان الحبايب لازم ينعاد من الأول 

مصريين في نهر الأردن

صورة عام 1900 لحجاج "مقدسون" مصريون مسيحيون يغتسلون في نهر #الأردن #فلسطين يوم الغطاس #تراث_مصر في الكونجرس 

الغطسة (عيد الغطاس) - عشريات الشهور المصرية

كل شهر له تلات عشريات...
العشرية التانية من طوبة واللي هتبدأ بكره هي عشرية مثل "طوبة يخلي الشابة كركوبة"، العشرية الأولى بتختمها وتبدأ للتانية بــ"الغطسة" - اللي هي بكره - الغطسة طقس مصري أصيل. الغطسة تعتبر غسيل للأرض بعد يومين العواصف اللي احنا فيهم لنا (بقالنا) كم يوم، وبدأت في أول العشرية الأولى منه وهديت المسألة في نص العشرية وختمت العشرية بنفس العواصف، لأننا بندخل في موسم الغرس (غرس البذور) (موسم الزراعة) يعني العواصف دي مش مجرد تراب وعفرة وبس. دي بتكون تلقيح ونقل بذور وملك تاني خالص...
وهنا النقطة بتاعت عيد البذر وليس الانقلاب الشتوي لأن الانقلاب الشتوي بيبقى في كياك"كيهك" بلاش خلط....
واللي احنا فيه هو فصل البرد "البذر"طبقًا للتقويم المصري المبني على تلات فصول في السنة مرتبطة بالمياه(الفيضان والأمطار) والتراب (الأرض والغرس والبذر) والهواء(العواصف والتلقيح والحصاد).
وعلى مدار الحقب في مصر وكعادتنا كمصريين بنحب الأكل ونربط أي مناسبة بأكل (ارتبطت الغطسة بالقصب والبرتقال والسوداني والقلقاس والسفندي واللب) بالترتيب ده هتلاقوا ارتباطات النباتات دي بالمتتالية التاريخية لمصر. - مش معنى كده إن النباتات دي ماكانتش موجودة في مصر، هي كانت موجودة بس فرق سلالات -
المهم إن التقلبات المناخية دي تقلبات وليست متغيرات. يعني المسار البيئي والمناخي في مصر -رغم التلوث- لسه شوية طبيعي زي ما التقويمات القديمة بتقول. العيب فين بقى؟ العيب فينا هنا كمنظومة وكبشر، يعني أنت عندك تقويم زراعي من آلاف السنين ويكاد يكون الأمثل والأكثر ملائمة لمجتمعك ما بتمشيش عليه ليه؟ وعلى أساس موائمة الظروف المناخية تقدر تشوف الوقت ده يناسب زراعة إيه أو مواعيد الطيران والموانئ تكون إيه بدل ما بتيجي تقول أصل بتوع الأرصاد قالوا ففجأة الناس تتلغي رحلاتها ومواعيدها فجأة وبدون ترتيب علشان الأرصاد قبلها بيوم قالت في عواصف في حين إن تقويمك المصري الزراعي (بتاع الفلاحين) بيقول لك، عندك خد بالك في عواصف علشان كيت وكيت وكيت.
طيب ليه طوبة مرتبط بالقصب لأنه القصب بيعشق المياه عشق مافي بعده عشق، والمياه في طوبة بتكون عالية بفعل الأمطار فصاحبنا بيشرب لما يتعمي. وطبعا في ارتباطات روحية تانية مرتبطة بالنمو والطبيعة وانتقل بعد كده بمعتقدات روحية تانية مرتبطة بالديانة المسيحية. لكن يظل الثابت والأساس ارتباطه بالزراعة المصرية والتقويم المصري القديم.
الغطسة بكره 11 طوبة / 20 يناير. اه وكمان في مثل مرتبط بالغطسة واتقال بعد الغزو العربي - أيوه غزو مش هنستهبل مع مصطلحات التاريخ - المهم المثل بيقول "غطست يا نصراني صيفت يا مسلم بعد أربعينين (40 و40 أي 80 يوم) وطبعًا الصيف في بشنس يعني بعد 80 يوم من طوبة...
قصره انزل هات قصبك قلقاسك سفنديهك برتقانك لبك وسودانك وتحضر للغطسة غدا واللي يقول لك مش هتمطر، اعْبُطُه ومده على رجليه بزعزوعة القصب.

الفراشة اتهورت مش اتطورت

معدية على عزاء فوجئت إن صوان الميتم تطور وبقي فيه شاشات عرض... مهنة الفراشة بتنفتح صوت وصورة
 أنا عمالة أضحك!! في كل زاوية فيه شاشاة lcd عارضة صورة المقرئ وتقريبًا كده العزاء متصور فيديو، مصائب قوم عند قوم مناظر
 بقول لك صوان، يعني في بلد ريفية تقول لي سرادق سيدات ^_^ السيدات بتعزي جوه البيت أو يفرشوا لهن حصير جنب البيت ويربعوا
 وكمان مافيش سيدات بتعزي في مادة، المادة في الوقت ده خاصة ربع العشا بيكون رجال بس، والسيدات أخرهم المغربية في بيت المتوفي
 سرادق في الأرياف يسمى "صوان" والصوان يسري على الأفراح والمآتم، أما الاسم الشائع للمآتم هي "مادة" والمادة تعني سرادق العزاء
 اللي فيه معزيين وفرش ومقرئ وقهوة وشاي داخلين خارجين وهكذا، الشكل الأساسي للمادة هو صوان خيامية وكراسي على الصفين وصفين ملاصقي  في نص الصوان، والصوان بيقام في حالة عدم وجود دوار للعائلة في البلد، أو بيكون تكملة للدوار في خارج المبنى لو المتوفي شخصية له
 حبايب كتير، وفي القرية ممكن يستغنوا عن كراسي الفراشة ويلموا دكك البلد بحالها يرصوها عند الدوار لو أهل الوفاة مقتصرين على
 التشييع وبعد العزا على المقابر وعند الدوار يقوموا واخدين دكك البلد حاطينها قصاد بيت المتوفي وعلى اخر الليل الشباب ترجع الدكك
تاني للبيوت، ولو عاملين "مادة" اللي هو صوان عزا سواء في دوار أو فراشة والناس اتسنجفت من المقرئ والمادة مطولة، يقول لك
 فلانة/فلان كانت مادته آخر عظمة شوفت الخلق اللي جت عزت ولا المقرئين....إلخ
 قال لك بقى المادة بتكون رجالة إنما الستات لهم عزا لوحدهم
 عزا الستات في الريف لحد فترة قريبة مختلف شوية، اختلافه كان في الست المقرئة اللي كانت بتيجي بعد فقرة الندابة تقعد تقرأ قرآن
 وعلى ذكر المقرئة كان في ست زماااااااااان بتيجي عندنا البلد في المآتم اسمها الشيخة عزيزة، كان صوتها حلو بصراحة وكان أغلب حضورها
للبلد في وفيات الإناث من البلد تقعد تقرأ في وسط الدار ما كانتش تقعد في الشارع أبدًا وكانت بعد ما تقرأ تقعد تقول أدعية وعليها
 شوية ذكر والستات ترد وراها لا إله إلا الله، وكان عزاء الستات مافيهوش كراسي أو حتى دكك بخلاف المادة اللي بيحضرها الرجالة، أهل
 بيت المتوفي أول ما السر الإلهي يطلع يفرشوا الأقيسة (جمع قياس وهو فرش على الأرض زي الحصير بس مش مصنوع من البلاستيك ده كان من خير الأرض مصنوع من الثُمار، وبصراحة البركة قلت من بعد ما انتشر البلاستيك) المهم القياس يتفرش والحصير البلاستيك يتفرش والسجاد والدكك والكنب والكراسي يتشال من جوه البيت علشان يوسعوا المكان ويتفرش بداله حصير وقياس علشان الهرس والدوس والستات تقعد عليه
 على الأرض وكل واحدة تيجي تواسي وتعزي واللي بتعرف تولول ما بتستناش عزومة، وكل بيت حواليهم يبعت حصيرة ويفرشها علشان تساع الستات
 خاصة لو في ستات غريبة هتيجي تعزي ما يصحش تقف لازم تقعد
 طبعًا الستات بتبدأ تتوافد وأغلب الدفن بيكون الضهر والدفن المتأخر إما وفاة جاية من القاهرة أو وفاة جاية من المستشفى، والرجالة
 واقفة بره خالص عند المسجد وعند الدوار منتظرين الجثة، سواء في بيتها أو جاية من المستشفى وقبل آذان الضهر بربع ساعة بيروحوا
 مجهزين النعش وياخدوا الجثة من البيت بعد ما تكون اتغسلت ويوروحوا بها على المسجد طبعًا في خروج النعش من البيت الستات تفتح على

  الرابع من عياط وصوات لحد ما يتصلى على المتوفي وياخدوه على التُرب ولازم يكون طريق اليمين حتى لو متصلي عليه في مسجد في اخر البلد

 ويرافق المشهد ستات من أهل المتوفي بس دول بيسبقوا يروحوا على الترب قبل الرجالة نادرًا لوطلعت ستات وراهم في الغالب بيروحوا قبل

الصلاة يلقوا نظرة الوداع ويرجعوا بعد الدفنة، طبعًا زمان كانت الستات بتدهن وشها نيلة "زهرة" وأحيانًا "تراب محماه" اللي هو

 التراب الناتج عن حرق القش في فرن الخبيز كنوع من القهرة والحزن ودي وراثة مصرية قديمة جدًا وفضلت مستمرة شوية لوقت قريب، ويمكن

 أنا في وقت ربط بينها وبين دهن زجاج النوافذ وقت النكسة باللون الزرق مش بس لأنه هيمنع ظهور الضوء لكن برضه قهرة وحزن جذورها

 مرتبطة بأصول مصرية قديمة، المهم رجعت الستات للبيت وبدأ الرجالة تقف تاخد العزا على الجبانة علشان الناس اللي وراها شغل ولازم تمشي وهترجع بالليل تكمل العزا في المادة، وده طبعًا ما يصحش لازم تيجي وتاكل عيب كده في وشنا. طبعًا في ظل اللي حاصل من دفن وصلاة 

بيتكون ستات البلد خاصة اللي من العائلة بتاعت المتوفي -مش أسرته- إنما العائلة (العزوة، العائلة الكبيرة يعني) بيكونوا جهزوا

 صواني الأكل، وصينية الأكل مالهاش أي مسمى غير أنها صينية الأكل والصينية دي في الوفاة بتتقال صينية أكل، وفي الفرح بتتقال عليها صينية العشا واتاخد الاسم ده عليها على طول حتى لو نزلت باب الشعرية أو أي بلد في الريف وسألتهم عن الصينية الألمونيوم الكبيرة قوي دي اسمها ايه هيقول صينية عشا، بتكون جهزت الصواني دي وسبقت الرجالة على الدوار، وراحت على بيت الميت صواني علشان الستات الغريبة و القريبة، لحد ما يطلعوا من التُرب ويجيوا، بتكون إيه مكونات الصينية بقى ودي حدوته هي كمان. صينية الأكل في العزا والمياتم بتتكون من دورق مياه (شفشق) وطبعًا لازم يكون زجاج وعيب عيب عيب يكون بلاستيك البلاستيك عند الريف حاجة قرف لكن مع الأسف بقى منتشر خلاص، المهم كوباية مع الدورق والصينية لازم تتغطى ببشكير أبيض وعيب عيب عيب يتغطى بجورنال ومع الأسف برضه بقى في ناس بقت تغطي بجورنال وده في عُرف العائلات الكبيرة قرف وقلة قيمة، نيجي بقى للأكل، المياتم لها أكل مميز جدًا، رز أبيض، لوبيا ناشفة، أو فاصوليا بيضاء ناشفة، أو بطاطس مطبوخة، وسلاطة خضرا، ولحمة مسلوقة، وعيش قمح. واللي ما طبخش وعاوز يبعت صينية ممكن يحمر بطاطس ومعاها حتتين جبنة قريش وجبنة قديمة وبيض برشت وعيش قمح وده نادر أما بيحصل أصلًا لأن أغلب الأكل بيكون طبيخ بس الجودة بالموجودة، والأكل بكده يكون خالي من مظاهر البهجة. بعد ما بيأكلوا بيمشوا ويرجع ناس منهم وقت العصر، يلحقوا الربع بتاع العصر، والربع ده بيُقرأ فيه قرآن في المادة بتاعت العزا ويريح المقرئ شوية ويبدأ ربع المغرب، ويريح ويبدأ ربع العشاء، طبعًا المعزيين رايحين جايين، من الرجالة على الدوار وعلى صوان العزا، إنما الستات بيكون العزا زي ما ذكرت في الأول عند بيت المتوفي وبيمشوا بعد العشاء برضه بس بيكونوا رايحين جايين يعني مش ثابتين هما هما من وقت الصبح، وفي سات بتطوع تطبخ غدا وعشا وتبعته صواني على بيت المتوفي...

دي سردية بسيطة على هامش المآتم في الريف

 

أهازيج الحج في مصر (وسائل النقل)

مقتطفات من تحنين الحجيج المرتبط بوسائل النقل
(متجدد على حسب الذاكرة، والبحث. أيهما أقرب.)

وإدونا الأمارة يا اللي زورتوا النبي إدونا الأمارة

إدونا الأمارة يا جمل يا أبو خف زينه

رايح فين يا جمل إدونا الأمارة يا أبو الخف زينه

رايح أودي حبيبي يزور نبينا وإدونا الأمارة

يا جمل يا جمل إذا جبت لي أحبابي أعلفك يا جمل بسمسم وجلابي

يا جمل يا جمل إذا جبتهم لي لأعلفك يا جمل على طرف كمي

يا جمل يا جمل إذا جبت سيدك لأعلفك يا جمل وأزود عليجك

هاتوا لها السلاسل هاتوها

هاتوا لها السلاسل الجمال هامت

هاتوا لها السلاسل غرضها تسافر

يمينك يمينك إن نويت يا حاجج
يمينك يمينك وبرك هجينك
يمينك شمالك وبرك جمالك

#تراث_مصر #الحج #تحنين_الحجيج #زفة_الحجاج

يا وابور النبي يا أبو أربع مراوح

هاموا الحجاج وقالوا على جدة رايح

يا وابور النبي يا أحمر يا عدسي

من يوم ما هويت النبي

صحاني من نعسي

يا وابور النبي يا أحمر يا دومي

من يوم ما هويت النبي صحاني من نومي

يا وابور النبي يا أبو دراع حديد

لأكنسك وأرشك يا واخد حبيبي

وإن جبت حبيبي لأكنسك وأرشك وبالشمع أقيدك

 وديني يا دليل وديني
ع النبي أشوفه بعيني 

النبي أهو عدى وفات
على منى وجبل عرفات

ربطوا الزكايب ع الوابور ربطوا الزكايب

أنا قمت عيني ع الوابور وبكت الحبايب

ربطوا الزكيبة ع الوابور ربطوا الزكيبة

وأنا قممت عيني ع الوابور بكت الحبيبة

#تراث_مصر #الحج #تحنين_الحجيج #زفة_الحجاج

يا ريس الباخرة مال الموج ميراري

ما تخافيش يا حاجة ده ريس أراري

يا ريس الباخرة مال الموج مضلم

ما تخافيش يا حاجة ده ريس معلم

يا وابور البحر يا أبو أربع مداخن

سلمك سلمك على مكة داخل

#تراث_مصر #الحج #تحنين_الحجيج #زفة_الحجاج 

عمولة يهودي جزمتك يا حاجج

لأجل مشي الجبال يا حاجج ودوس الدروبي

عمولة نصارى جزمتك يا حاجج 

لأجل مشي الجبال يا حاجج ودوس الحجارة

عليِّ باب الأوضة يا واد يا بنا

البيوت المصرية زمان وخاصة في الريف كانت بتمتاز بموائمتها للوضع المناخي على حسب طبيعة الأرض المبني عليها البيت، فكان -ولا زال في بعض المناطق- المصري يبني داره من طينة الأرض اللي عايش عليها يعني شكل من أشكال الجهازالمناعي أنه يقاوم من مكوناته أي تغيير في الطقس.

علشان كده كان بيتقال الدار الطين في الشتا دفا وفي الصيف طراوة، لأن الطينة مادة بطبيعتها بتتعامل مع الطبيعة بأنها جزء منها ومش مصنعة بشكل كامل زي الطوب الأحمر مثلًا، ومسام الطينة بتشتغل مع الإنسان ولا أجدعها تكييف!

تحضير خامات الدار كانت كالتالي

* رطش أو رتش على حسب نطق المناطق الريفية وهو التراب اللي بيجي من الأرض الزراعية بعد ما بتكون أخدت الغذا بتاعها منه وبيكون ناشف جدًا على خلاف "السباخ" اللي بيكون طري حبتين والسباخ هو السماد الطبيعي اللي بينزل الأرض الزراعية علشان تتغذى منه وتأكل -الأرض والزرع زي البشر بيأكلوا وبيشربوا- المهم السباخ بيكون جاي من تفاعل الرطش/الرتش وفضلات المواشي / البهايم فبالتالي بيكون سماد طبيعي وطبعًا ما ينفعش يتبني به، فالبناء بيكون من رطش الأرض.

* تبن، والتبن بيكون منتوج ما تم فرمه من قش القمح بعد ما تم درس القمح في الدراسة (الآلة اللي بتقوم بفصل الحب عن القش) ولازم يكون قش قمح أو قش شعير أو كتان، أما قش الدرة لأ لأنه رائحته سيئة، المهم علشان ما نرغيش كتير التبن جزء من منظومة البناء.

* مياه بكمية تناسب المعجنة.

* قالب طوب / اسطمبة ودي بتكون مصنوعة من الخشب وعلى شكل مستطيل وله ضلع يزيد عن نصف طوله علشان يكون مقبض لخلع القالب من الطين والإمساك به.

والطريقة كالتالي بيتجاب الرطش في مساحة أرض واسعة علشان المعجنة تاخد راحتها، ويتحط على شكل دايرة مفرغة من النص ويترش عليها كمية مناسبة من التبن وبعدين تترش المياه وتتم المعجنة من خلال مجموعة من الأشخاص لو المعجنة كبيرة أو شخصين لو هي صغيرة وكل واحد يقف برجله ويفضل يغرز ويدوس جوه العجينة وتتساب لمدة كم يوم علشان تتخمر زيها زي عجينة العيش بس دي بتتساب لأيام وعلى حسب درجة الحرارة طبعًا، ولو المياه قلت تترش مياه عادي بس المهم أنها ما تبقاش روبه "شبه الجبنة الدوبل كريم كده يعني" علشان القالب يمسك في العجينة ما ترنخش "ترنخ يعني تسيب كده وتبقى شبه الممادة الرخوة" المهم المعجنة اتعجنت نيجي للتقريص بقى ^_^ ايه اللي بيحصل عارفين عجينة العيش والتقطيع للأرغفة هو ده اللي بيحصل ايه الللي بيحصل؟

بيجوا الناس راشين على الأرض كمية تبن زيها زي الردة اللي بتحطوها تحت العيش المهم نجيب القالب ونحطه ع الأرض المرشوشة تبن ونقوم مكورين كورة طينة من الممعجنة ونصبها جوه القالب ونساويه بس لازم يكون القالب مرشوش مياه والإيدين مبلوله مياه علشان ما تبقاش مكتلة كده، أيوه زي ما بتعملوا في عجينة العيش... نيجي بقى نخلع القالب هنلاقي العجينة أخدت شكل مستطيل وما ريحتش طبعًا لأنها اتعجنت صح واتخمرت بالمظبوط. طبعًا المسألة طويلة أنك تقعد تشكل العجينة في قالب علشان تعمل الكمية اللي أنت محتاجها، وبينساب الطوب في الخلاء ويترش عليه من فوق تبن ويفضل كم يوم في الشمس لحد ما ينشف تمام.

نيجي لوقت البناء بيتعجن عجينة شبه اللي فاتت وتتخمر كم ساعة بس، ويبدأ البنا يحفر عمق لقالب الطوب علشان يحط الأساسات والعواميد، والعواميد دي بتكون إما جزعين نخل مشقوقين، أو عودين بوص بامبو، أو عرقين خشب من شجرة كافور وأحيانًا ما بيتحطش ويكتفوا برص الطوب، يجي البنا يحط القالب ويليسه بالطينة المعجونة ويرص القالب اللي بعده، نفس العمملية بتاعت المباني اللي بالطوب الأحمر والأسمنت، بعد كده يعرش السقف، ويعرش هنا معناها يعمل سقف الدار ودي بتكون إما حصير بوص متخوصه أو قش دره، ودي بتتحط ما بين عرقين خشب أو عودين البامبو، ويتليسوا بالطين برضه، وبعد ما الدار تنشف شوية يقوم البنا جايب نفس المعجنة ويقوم داهك الدار بره وجوه بالطين ودي نفس عملية "الممحاراتي" بيمحر بس هنا بالطين، وتبقى دار عشرة على عشرة، وطبعًا لو أصحابها مقتدرين بيغفقوها "بيغفئوها" ويدهنوها بألوان الجير بره وجوه، وبدل ما تكون أرضية الدار أرض طينية عادية غير ممهدة فبيقوم أصحابها عاملينها "حُمرة" والحمرة دي عبارة عن نوع من أنواع الأسمنت وعليه مادة لونية حمراء ويبلطوا الأرض بها، أو كسرة طوب أحمر ومتدشدش "مطحون" وبكده بقت دار زي الفل.

طيب ايه وجه الاستفادة من ده كله؟ وجه الاستفادة أن طريقة البناء دي كانت بتخلي اللي قاعد جوه البيت لو الجو حر يلاقي تكييف هوا زي الفل جوه ورباني من غير لا كهربا ولا دياولوا وده نتيجة مسام الطين المعجون وتفاعل الطين مع الجو، ولو الدنيا برد البيت دي بيكون دفا بس مشكلته بتكون لو في مطرة شديدة والبيت مش متغفق طويس بيرطبه حبتين لكن لما الشمس بتطلع بيكون نشف، وطبعًا السقف ممتحبك فمافيش مشكلة الدار أمان. ويمكن دي نفس العمملية اللي الناس بتحسها لما تشرب من القلة في الصيف وتلاقيها باردة ومنعشة...

الصور الملحقة تصويري ومن بيتنا وعمره أزيد من 80 سنة، والقالب الخشبي شبيه لقالب صب الطوب.

أي ترجمة اسأل استشير...

*كتبت التدوينة للإجابة عن استفسار إحداهن على تويتر، والتدوينة مختصرة إلى حد ما...

انقذوا الآثار المصرية

ضد خصخصة التراث والآثار المصرية، ونريد تشريعات قانونية واضحة من أجل المحافظة على التاريخ المصري، بكافة صنوفه وفتراته وطوائفه. #تراث_مصر_ليس_للبيع #انقذوا_الآثار_المصرية #مصر

#شارك #ادعم 

رابط المبادرة

"مبادرة تراث مصر ليس للبيع" 

جاتك نيلة - جاك نيلة

النيلة وهي اللفظ الأكثر شهرة في ربوع المجتمع المصري، دلالة على خيبة الأمل، القهرة أو النفور من شيء ما ، عبارة عن نبات أيوه النيلة نبات  ترجع أصوله لأشهر حضارتين في التاريخ، الحضارة المصرية والحضارة الهندية. لكن اللي فضلت أكثر شهرة هي النيلة الهندية نتيجة للنشاط النسيجي في دولة الهند واللي فضل جزء راسخ من تكوين المواطن الهندي في استثماراته حتى لو خرج بره الهند.. وانقطم وسطه عندنا في مصر بعدما كانت قلعة من قلاع النسيج في العالم...

نبات النيلة من فصيلة البقوليات / الفوليات (الفول، البسلة، اللوبيا، العدس إلى اخر قائمة البقوليات) وبيتم استخراج صبغة كالحة الزرقة أو الأزرق الغامق القريب من الكلحان، واللون اللبني الخفيف القريب من لون السماء.

النيلة كونت جزء من التراث المصري سواء على صعيد النسيج أو النحيب، في النسيج كانت من أقدم الصبغات اللي تعرف عليها المصري القديم ودخلت في صبغ منسوجاته خاصة ملابس الحزن والحداد، وهنا يجي دور النحيب فنلاقي ان المصري كان بيدهك وشه نيلة كدلالة على قهرة الموت زيها زي اللطم والعديد وفضلت العادة دي مستمرة لوقت قريب في القرى المصرية، على جانب الدلتا فضلت حتى أوائل السبعينيات، وفي قرى الصعيد فضلت حتى وقت متأخر جزء من مراسم الجنازة.

وتحولت النيلة فيما بعد لـ "زهرة الغسيل" الكيميائية واللي تكونت نتيجة خلط مجموعة من المعادن الكيميائية زي الفوسفات والنحاس، وطبعًا النيلة النباتية غير النيلة الكيميائية، طبقًا لاختلاف المكونات والأصل، لكن الثابت ان الزهرة حلت محل النيلة في طقوس العديد والموت، زد على ذلك استخدامها في الهروب من الجهادية "التجنيد" وده عن طريق وضع الزهرة الكيميائية في العين وقت الكشف الطبي والغشيم اللي تفوت منه ويبوظ عينه.

ومن هنا توسع وانتشر مصطلح جاك نيلة - جاتك نيلة - يجيك نيلة - ينيلك - اتنيل - بلا نيلة - اتنيلت.

 #محتوى_الصورة نبات النيلة الشبيه بنبات الفول وباقي البقوليات، الصورة على اليمين صورة مرسومة والصورة على اليسار صورة فوتوغرافية للنبات.

ملحوظة: السرد بمزج ما بين العامية والفصحى لأنه مجرد سرد عادي ^_^

يا هو

"هو" زخرفة نباتية بجوار البرج، قصر الأمير محمد علي محمد توفيق، منطقة المنيل، القاهرة.
تصويري.
السبت - 4/4/2015

بائع البرتقال

"يا ورد الجناين يا حلو يا بوردوأن" بائع متجول ينادم الآن على البرتقال

"يا رزق الأكالة يا حلو، يا رزق الأكالة يا بوردوأن" #هتاف_الصامتين 

في بلد في المنوفية اسمها فيشا الصغرى في شيء مميز فيها بخلاف المنازل العريقة اللي فيها، إن دور "جمع منزل، بلغة الريف" كتير فيها، محفور على شراعة بابها فوق تاريخ الإنشاء وفيها بيوت من 1800 لسه الباب بالشراعة موجود زي ما هو ده غير المقتبس من الانجيل من آيات وحفر أويمة لصلبان... ده تراث انساني مهم جدًا أتمنى ما يندفنش 

الأيام السوداء

يا مستكتر الأيام السودة جاية...

يقال لمن يبذر ويسرف في أمواله، كتنبيه أن هناك أيام بأس قادمة، مثل مثل القرش الأبيض ينفع في اليوم الأسود.

الفقر والخلفة

من يوم جبتكم يا دلالة ما نمت مع أبوكم عريانة ولا كلت بصلة بورقها ولا خسة بعصبها #أمثال_مصرية 

بقر سمان يأكل بقر عجاف

العروسة

لما يكون في فرح والدنيا تشتي (تمطر) جامد بيقول الناس "العروسة لحست المغرفة "

مواوويل شعبية

ع الأصل دور ونقي الأصيل وإياك
ما دام غويت النسب مهرك يكون وياك
خد بنت رجل أصيل تلقى الكرم وياك
ما دام غويت النسب نقي لابنك أم
البيت شبيه مدرسة والناظرة هي الأم 
ابنك وبنتك كمالهم من كمال الأم 
بعناية الأم يمشوا العمر وياك

الغطسة

غطست يا نصراني، صيفت يا مسلم بعد أربعينين #الغطسة #الغطاس #أمثال #تراث_مصري

الغطاس بيكون 11 #طوبة عد من بعد يوم 11، 80 يوم "أربعينين" نكون دخلنا الصيف #بشنس، المثل اتقال بعد دخول العرب مصر

والغطاس في أصله مصري لكنه يتوافق نظرًا للتراث المسيحي مع تعميد المسيح في الأردن وطبعًا هو عيد من أعياد المسيحين الشرقيين في الوقت الحالي، وفي الأصل عيد مصري أصيل مرتبط بالبذر والريح والمطر...

الجيرة

إذا كرهك جارك غير باب دارك

تياترو الهمبرا

 

#تياترو الهمبرا بالقاهرة ،في شارع #عماد_الدين تحيي فيه السيدة #بديعة ليلة من ليالي المسرح ابتهاجًا بالزفاف الملكي السعيد...
سمي مسرح الهمبرا بمسرح الحمراء أيضًا، نسبة إلى قصر الحمراء بالأندلس "أسبانيا" ،وفي أقوال أخرى نسبة إلى أشهر مسارح #لندن الأثرية مسرح الهمبرا والذي أنشيء في عام 1854م تقريبًا في بريطانيا فهناك يحتفظون بتراثهم وذاكرتهم.وقد كان بمصر مسرحان ينتسبا لهذا الإسم أحدهما في #الإسكندرية والآخر في #القاهرة أما مسرحنا هنا فقد أصبح الآن ملهى للأطفال على شاطئ البحر ،يسمى ملاهي السندباد!!! والآخر في #القاهرة صار دار #سينما لوكس.
بعدما كان يضج بكبار فناني #مصر ورواد النهضة الفنية والفكرية بها آنذاك، يقع مسرح الهمبرا في منطقة #محطة_الرمل بالإسكندرية شأنه كشأن مسارح الإسكندرية العريقة التي لطالما رحبت بمئات المبدعين بداية من جورج أبيض وعزيز عيد ونجيب الريحاني مرورًا بالست #بديعة صاحبة الصورة ، والسيدة #أم_كلثوم و #اسماعيل_يس وغيرهم من عمالقة الفن في #الزمن_الجميل ،ويقع الآخر في شارع عماد الدين ويحل محله الآن سينما لوكس... #تراث_مصري

أهازيج الحج في مصر

قال لك ده كان يلاغي القمر محمد ويفهم لغاته #الحج #تراث_مصري #زفة_الحجاج

قال لك ايه بأه ... يا فاطمة يا فاطمة يا بنت نبينا افتحي البوابة يا فاطمه أبوكي داعينا #الحج #تراث_مصري #زفة_الحجيج 

 واحنا اللي فوزنا يا عمي وأخدنا التأشيرة لأجل العربي المكمل جد المشيرة. #تراث_مصري حديث #زفة_الحجاج #الحج
قال لك ايه بأه... اه يا نخله مكه يا طويل يا عالي يا اللي تمر منك دوا المبالي #الحج #زفة_الحجاج #تراث_مصري

قال لك ايه بأه... رايحة فين يا حاجة وشاقة البحوري ،رايحة أزور النبي محمد وأزمزم شعوري #تراث_مصري #زفة_الحجاج #الحج 

قال لك ايه بأه... يا نبي يا نبي يا مالك أحبة ،حملوا عيالهم يا نبي وجم لك محبة #تراث_مصري #زفة_الحجاج #الحج
قال لك ايه بأه... وياريس البواخر ما توقف شوية خلي أبويا الغالي يسلم عليَّ #زفة_الحجاج #الحج #تراث_مصري

 ولما نويت يا حاج وربطنا الزكيبة ولما بلغنا عنوانه زغردت الحبيبة #تراث_مصري #الحج #زفة_الحجاج

 وفي ليلة التبريكه يا عمي بات الخُرج بره يا ملايكه عيني ما تبكي على الفرقة والله #الحج #زفة_الحجاج #تراث_مصري

 حلو بابور النبي يا أحمر يا عدسي من يوم هويت النبي صحاني من نعاسي #تراث_مصري #زفة_الحجاج #الحج

 حلو بابور النبي يا أبو أربع مراوح فرح الحجاج ويقولوا على جده رايح #تراث_مصري #زفة_الحجاج #الحج

 ولما زرته يا حاج حجيج هات لنا الوصيفة وتحت راس النبي مخده قطيفه #تراث_مصري #الحج #زفة_الحجاج

 ولما نويت يا عمي خد الزمزمية لحسن تلاقي العرب فوق العز 100 #زفة_الحجاج #الحج #تراث_مصري

 حلو حمام الحما يا أبو الريش متزوق رشوا له السمسم يا حاجي على باب محمد #تراث_مصري #زفة_الحجاج #الحج

 وحلو باب النبي خشبه مفصل يا نهار المنى يا حاجج وأنا ميتى أوصل #تراث_مصري #زفة_الحجاج #الحج

 ويا بشير الهنا يا مروح بلدنا زرنا الحبيب النبي وروح بشر ولادنا #تراث_مصري #زفة_الحجاج #الحج

 دقوا الطبول للنبي بودني سمعته أنا هان عليَّ بيتي ومالي نفضته #تراث_مصري #الحج #زفة_الحجاج

 في طريق النبي جنينه رشوها بنوها الحبايب لفاطمة وأبوها #تراث_مصري #الحج #زفة_الحجاج

لما نويت ع النبي يمينك يمينك وعند باب النبي يا بوي وقف هجينك #تراث_مصري #الحج #زفة_الحجاج