الفراشة اتهورت مش اتطورت

معدية على عزاء فوجئت إن صوان الميتم تطور وبقي فيه شاشات عرض... مهنة الفراشة بتنفتح صوت وصورة
 أنا عمالة أضحك!! في كل زاوية فيه شاشاة lcd عارضة صورة المقرئ وتقريبًا كده العزاء متصور فيديو، مصائب قوم عند قوم مناظر
 بقول لك صوان، يعني في بلد ريفية تقول لي سرادق سيدات ^_^ السيدات بتعزي جوه البيت أو يفرشوا لهن حصير جنب البيت ويربعوا
 وكمان مافيش سيدات بتعزي في مادة، المادة في الوقت ده خاصة ربع العشا بيكون رجال بس، والسيدات أخرهم المغربية في بيت المتوفي
 سرادق في الأرياف يسمى "صوان" والصوان يسري على الأفراح والمآتم، أما الاسم الشائع للمآتم هي "مادة" والمادة تعني سرادق العزاء
 اللي فيه معزيين وفرش ومقرئ وقهوة وشاي داخلين خارجين وهكذا، الشكل الأساسي للمادة هو صوان خيامية وكراسي على الصفين وصفين ملاصقي  في نص الصوان، والصوان بيقام في حالة عدم وجود دوار للعائلة في البلد، أو بيكون تكملة للدوار في خارج المبنى لو المتوفي شخصية له
 حبايب كتير، وفي القرية ممكن يستغنوا عن كراسي الفراشة ويلموا دكك البلد بحالها يرصوها عند الدوار لو أهل الوفاة مقتصرين على
 التشييع وبعد العزا على المقابر وعند الدوار يقوموا واخدين دكك البلد حاطينها قصاد بيت المتوفي وعلى اخر الليل الشباب ترجع الدكك
تاني للبيوت، ولو عاملين "مادة" اللي هو صوان عزا سواء في دوار أو فراشة والناس اتسنجفت من المقرئ والمادة مطولة، يقول لك
 فلانة/فلان كانت مادته آخر عظمة شوفت الخلق اللي جت عزت ولا المقرئين....إلخ
 قال لك بقى المادة بتكون رجالة إنما الستات لهم عزا لوحدهم
 عزا الستات في الريف لحد فترة قريبة مختلف شوية، اختلافه كان في الست المقرئة اللي كانت بتيجي بعد فقرة الندابة تقعد تقرأ قرآن
 وعلى ذكر المقرئة كان في ست زماااااااااان بتيجي عندنا البلد في المآتم اسمها الشيخة عزيزة، كان صوتها حلو بصراحة وكان أغلب حضورها
للبلد في وفيات الإناث من البلد تقعد تقرأ في وسط الدار ما كانتش تقعد في الشارع أبدًا وكانت بعد ما تقرأ تقعد تقول أدعية وعليها
 شوية ذكر والستات ترد وراها لا إله إلا الله، وكان عزاء الستات مافيهوش كراسي أو حتى دكك بخلاف المادة اللي بيحضرها الرجالة، أهل
 بيت المتوفي أول ما السر الإلهي يطلع يفرشوا الأقيسة (جمع قياس وهو فرش على الأرض زي الحصير بس مش مصنوع من البلاستيك ده كان من خير الأرض مصنوع من الثُمار، وبصراحة البركة قلت من بعد ما انتشر البلاستيك) المهم القياس يتفرش والحصير البلاستيك يتفرش والسجاد والدكك والكنب والكراسي يتشال من جوه البيت علشان يوسعوا المكان ويتفرش بداله حصير وقياس علشان الهرس والدوس والستات تقعد عليه
 على الأرض وكل واحدة تيجي تواسي وتعزي واللي بتعرف تولول ما بتستناش عزومة، وكل بيت حواليهم يبعت حصيرة ويفرشها علشان تساع الستات
 خاصة لو في ستات غريبة هتيجي تعزي ما يصحش تقف لازم تقعد
 طبعًا الستات بتبدأ تتوافد وأغلب الدفن بيكون الضهر والدفن المتأخر إما وفاة جاية من القاهرة أو وفاة جاية من المستشفى، والرجالة
 واقفة بره خالص عند المسجد وعند الدوار منتظرين الجثة، سواء في بيتها أو جاية من المستشفى وقبل آذان الضهر بربع ساعة بيروحوا
 مجهزين النعش وياخدوا الجثة من البيت بعد ما تكون اتغسلت ويوروحوا بها على المسجد طبعًا في خروج النعش من البيت الستات تفتح على

  الرابع من عياط وصوات لحد ما يتصلى على المتوفي وياخدوه على التُرب ولازم يكون طريق اليمين حتى لو متصلي عليه في مسجد في اخر البلد

 ويرافق المشهد ستات من أهل المتوفي بس دول بيسبقوا يروحوا على الترب قبل الرجالة نادرًا لوطلعت ستات وراهم في الغالب بيروحوا قبل

الصلاة يلقوا نظرة الوداع ويرجعوا بعد الدفنة، طبعًا زمان كانت الستات بتدهن وشها نيلة "زهرة" وأحيانًا "تراب محماه" اللي هو

 التراب الناتج عن حرق القش في فرن الخبيز كنوع من القهرة والحزن ودي وراثة مصرية قديمة جدًا وفضلت مستمرة شوية لوقت قريب، ويمكن

 أنا في وقت ربط بينها وبين دهن زجاج النوافذ وقت النكسة باللون الزرق مش بس لأنه هيمنع ظهور الضوء لكن برضه قهرة وحزن جذورها

 مرتبطة بأصول مصرية قديمة، المهم رجعت الستات للبيت وبدأ الرجالة تقف تاخد العزا على الجبانة علشان الناس اللي وراها شغل ولازم تمشي وهترجع بالليل تكمل العزا في المادة، وده طبعًا ما يصحش لازم تيجي وتاكل عيب كده في وشنا. طبعًا في ظل اللي حاصل من دفن وصلاة 

بيتكون ستات البلد خاصة اللي من العائلة بتاعت المتوفي -مش أسرته- إنما العائلة (العزوة، العائلة الكبيرة يعني) بيكونوا جهزوا

 صواني الأكل، وصينية الأكل مالهاش أي مسمى غير أنها صينية الأكل والصينية دي في الوفاة بتتقال صينية أكل، وفي الفرح بتتقال عليها صينية العشا واتاخد الاسم ده عليها على طول حتى لو نزلت باب الشعرية أو أي بلد في الريف وسألتهم عن الصينية الألمونيوم الكبيرة قوي دي اسمها ايه هيقول صينية عشا، بتكون جهزت الصواني دي وسبقت الرجالة على الدوار، وراحت على بيت الميت صواني علشان الستات الغريبة و القريبة، لحد ما يطلعوا من التُرب ويجيوا، بتكون إيه مكونات الصينية بقى ودي حدوته هي كمان. صينية الأكل في العزا والمياتم بتتكون من دورق مياه (شفشق) وطبعًا لازم يكون زجاج وعيب عيب عيب يكون بلاستيك البلاستيك عند الريف حاجة قرف لكن مع الأسف بقى منتشر خلاص، المهم كوباية مع الدورق والصينية لازم تتغطى ببشكير أبيض وعيب عيب عيب يتغطى بجورنال ومع الأسف برضه بقى في ناس بقت تغطي بجورنال وده في عُرف العائلات الكبيرة قرف وقلة قيمة، نيجي بقى للأكل، المياتم لها أكل مميز جدًا، رز أبيض، لوبيا ناشفة، أو فاصوليا بيضاء ناشفة، أو بطاطس مطبوخة، وسلاطة خضرا، ولحمة مسلوقة، وعيش قمح. واللي ما طبخش وعاوز يبعت صينية ممكن يحمر بطاطس ومعاها حتتين جبنة قريش وجبنة قديمة وبيض برشت وعيش قمح وده نادر أما بيحصل أصلًا لأن أغلب الأكل بيكون طبيخ بس الجودة بالموجودة، والأكل بكده يكون خالي من مظاهر البهجة. بعد ما بيأكلوا بيمشوا ويرجع ناس منهم وقت العصر، يلحقوا الربع بتاع العصر، والربع ده بيُقرأ فيه قرآن في المادة بتاعت العزا ويريح المقرئ شوية ويبدأ ربع المغرب، ويريح ويبدأ ربع العشاء، طبعًا المعزيين رايحين جايين، من الرجالة على الدوار وعلى صوان العزا، إنما الستات بيكون العزا زي ما ذكرت في الأول عند بيت المتوفي وبيمشوا بعد العشاء برضه بس بيكونوا رايحين جايين يعني مش ثابتين هما هما من وقت الصبح، وفي سات بتطوع تطبخ غدا وعشا وتبعته صواني على بيت المتوفي...

دي سردية بسيطة على هامش المآتم في الريف

 

العنصرية

@iNarchic الرد طويل شوية،لا يوجد نفي للوعي الجمعي أو للخصائص العامة المشتركة التي تفرضها طبيعة المكان وإلى اخره من عوامل ديموغرافية، لكن ما أتحدث عنه ويخص مجتمعنا لأني الحقيقة لم أتعايش مع مجتمعات أخرى -ربنا يبعت ونجرب هو أنا أكره- محور كلامي يدور حول جهل أفراد التجمعات والجماعات الصغيرة دي بالممجتمع ككل، بمعنى جهل كل فئة للفئة الأخرى، والصفات العامة المشتركة هي مشتركة في المعنى العريض لصفة مع اختلافها في التنفيذ، على سبيل المثال القهر موجود في الممجتمع من أقصى الشمال على الساحل إلى أقصى الجنوب على المثلث لكن فعلة القهر مختلفة وما ينتج هو تنفيذ قهر الأفراد وإنكار نفس الجماعات دي لفعلة الجماعات الأخرى من قهر في حين أنها تنفذ نفس الصفة لكن في أمر اخر، هضطر أخد المثال الحالي المتعلق بالحجاب للأسف الشديد بس علشان أقرب لك ما أعنيه من كلامي مع ترك الوعي الجمعي أو العقل الجمعي على جنب لأنه حتى في مجتمعنا متجزأ لفرق.
اللي بيحصل كالتالي جماعة صغيرة بتنفي الهوجة على الحجاب وتقول كل واحد حر، في حين أن جماعة أخرى مماثلة تثور لهذا الأمر ولو حصل يبقى ازاااااااااااااي ازاي تقلعيه انت كده "ش" أو ألحدتي الخ الألفاظ المطروحة، إذاًا هنا جها تام حدث من قبل جماعة تجاه جماعة أخرى مكونة وياها للمجتمع الكبير، ونتيجة جهل الجماعات ببعضها بيحصل حالة فوران وتخبط يؤدي لخلخلة زيادة للمجتمع فوق ما هو متخلخل لكن أنت هنا تحت سيطرة الجهل بالاخر، مثال تاني ان نفس الجماعة اللي بتثور حماية للدين للأخلاق بلا بلا جماعة عنصرية ضد البشرة السوداء في مجتمعنا في حين ان الأديان نفسها بتنكر وتنهي الأمر وهو أوجب لكن لأن برضه هنرج للمعنى العريض للصفات المشتركة في العنصرية هتلاقي جماعة تجهل وجود جماعة سوداء في مجتمعها وأنهم مكون حيوي للمجتمع، مثال تالت الجهل بأيدولوجية المجتمع خلتنا نتخبط في بداية الثورة ونتج عن الجهل ده ان كله طلع الورق الوسخ بتاعه وكل واحد نظر بالأرجنتين مرة بروممانيا مرة بأسبانيا مرة لكن ولا مرة اتكلموا عن شرائح المجتمع دي ايه وعاوزة ايهوتفكيرها ازاي، ففي النهاية كل جمماعة بتتكلكع على ذاتها وتبص للجماعة التانية في جهل تام. وده نتيجة لتراكمات كتيرة وضحالة التعليم والجهل وغياب القانون الحي وغياب معنى الدولة نفسها عند الناس...

مهن قديمة

على تويتر نتيجة لهاشتاج مهن للتويتريين. أطلقت اسم تأريخى على أحد التويتريين. وبها كان اختلاف على حرف (الياسرجي و الياسريجي) فالأولى كانت مهنة دلال العبيد الشخص الذي يدلل لبيع أسرى الحروب وغيره. و كان على إثرها هاشتاج لمهن قديمة تكاد تكون دفنت...كلمة "ألاجا" لما نشوف حد متشيك ولابس اللي ع الحبل بنقول له إيه الألاجا دي كلها تعالوا نعرف جت منين كان في مهنة قديمة اسمها مهنة الألاجاتي وده كان الشخص المعني بصناعة الألالاجا وهو نوع من الأقمشة.
ألالاجا هي نوع من أنواع الأقمشة المصنوعة من الحرير والقطن.
في منها نوعين مصري وهندي يجي عمنا ألاجاتي يغزل الحرير مع القطن ويعمل القماش ده وبيمر على صناعته كذا مهنة قديمة برضه. قماشة الألالاجا بيشتغل عليها الفتال والمسدي والصباغ والكبابة ،الصباغ طبعًا كانت وفضلت بنفس المعنى والمهنة وهو الشخص المعني بصبغ اللون. الحائك والنساج مهنتين قريبين من بعض، وهو بينسج الخيوط ويخيط التوب من القماش سواء كان الألاجا أو غيره .
كبابة الحرير وهي مهنة لمن يفرز أقمشة الألاجا وتسلم جزء للفتال وجزء تاني للحائك على حسب نوع وجودة القماش. 
مهنة الدقاق والكباس ناس كانت بتقوم بغسل الحرير وكبسه بطريقة معينة بتدي له اللمعه .كراكوزاتي أو الأراجوزاتي فيما بعد هي مهنة معنية بصناعة مجسمات وتحريكها يعنى لعبة خيال الضل اللي كنا بنتفرج عليها زمان ع القناة التانية. 
مهنة القباني اللي هو هو مسمى ميزان القباني بتاع تلاجات الخضار ومخازن الغلال هو الشخص اللي بيوزن الموازين الضخمه. 
مهنة الدهاك وهي من فعل دهك وهو الشخص اللي كان بيدهك البيوت زمان بالطين بعد ما تتبني الجدران بالطوب الني (اللبن) و يقوم داهكها بالطينه.