لو عديت حط حط

في حفلة من الحفلات اللي غنى فيها رشدي أغنية لو عديت، قال جملة في الأغنية غير مدرجة في باقي الحفلات والتسجيلات اللي غنى فيها نفس الأغنية، وللعلم الأغنية من كلمات عبد الرحيم منصور فمسألة التأكيد على إن الجملة من نظم رشدي ولا نظم عبد الرحيم غير مؤكدة لأن الاتنين طينة واحدة.
 قال إيه بقى رشدي بعد دخلة الكورال، قال لو عديت على ناس يقولوا لك حط حط حط حط يا إنسان.
طبعًا المشهور إن بعد الكورال ما يقول يسلم ترابها الأسمراني إلى آخر الكلمات مالناش حبيبة غيرها تاني، بيقوم رشدي مغني مقطع لو عديت على ناس يقولوا لك مرحب مرحب يا إنسان. لكن رشدي بدأ بمقطع مختلف تماما وقال ناس يقولوا لك حط حط..



الناس اللي عاشت في الريف والصعيد يعرفوا أكتر مفعول كلمة حط حط، سواء في تربية الطيور أو تربية الإنسان، زي برضه حطحط عليه، بالبلدي خده تحت باطك وضمه، علشان يحس أنه مش لوحده. فكرة الحطحطة المحاوطة الاحتضان للشخص.
فكرة الكلمة نفسها بتوحي ببشر عندهم القدرة على الاحتواء لبعضهم، وتبيان لصفات كانت موجودة في مجتمعنا المصري ومع الأسف بتندثر في غفلة مننا، وحتى اللي ممكن يكون متوفرة لديه الصفات دي بيحاول الباقي أنهم ييسفهوا منها ويحولوها لمضامين للسذاجة والطيبة المبالغ فيها. أو يحطوها في تفسيرات تانية مالهاش أي أساس من الصحة المهم أنك تقتل الصفة دي وخلاص متعمد أو جات وياك بالبركة...

يا ليلة ما جاني الغالي

الملحن عبد العظيم محمد الله يرحمه أبدع في وصف حالة المحبوب أو( الغائب-المسافر- الشخص الغالي) لما يجي للي بيحبه في موسيقى يا ليلة ما جاني الغالي ودق عليََّ الباب، لحن كله فرح. 


خاصة في مقدمة اللحن. والمستمع له بيشعر بحالة من الانبساط لسماعه، يمكن لوجود الطبل (البلدي) الصعيدي فيه، كخلفية واحدة مستمرة طول اللحن وهو بطبيعته عند الإنسان المصري باعث على الفرح ودموع الفرح والحنين برضه، وجرت العادة على أنه مُفرح ومبهج. على عكس السبس الصعيدي باعث للشجن والحزن، ويمكن السبس متميز ومميز عن المزمار في إن له هوية محددة لا يحيد عنها، الحزن والشجن والوجع والأنين. المزمار الصعيدي بين بين، يعني على حسب موضعه في اللحن وفي الغالب بيبعث بهجة خاصة في اقترانه مع رقص الخيل. ويمكن لأن عبد العظيم محمد أصوله من محافظة المنيا وهي نفس بلد عمار الشريعي -مع اختلاف مسقط الرأس- واللي لحن لشادية أغنية "إن كنت ليَّا وأنا ليك" وكان بنفس مدرسة عبد العظيم محمد في اللحن ده، أو إن تراث المنيا الموسيقي وضع بذرته وأثر في الشخصين!!!

أيوه عبد العظيم محمد هو ملحن الأغنية مش بليغ حمدي، وعبد العظيم محمد غير عبد العظيم عبد الحق. ويمكن المشترك بين التلاتة أنهم اشتغلوا مع محمد رشدي والأبنودي...