داير ما يدور

يا بنفسج داير ما يدور

يلا امسك طباشيرك دور

تباشيرك أهي باينة يا واد

والرسمة بتلات أبعاد

أدي ضلع عامل زنهار

وأدي ضلع فلاح له نهار

وأدي ضلع صياد بشباك

يا بنفسج يا وش الخير

على أرضك

ازرع فدادين

سنبلتك تيجي أردبين

كتانك أهو ملو العين

أقطانك فايضة بقنطار

يا بنفسج داير ما يدور

يلا امسك طباشيرك دور

يا بنفسج ترسك بيدور

والمصنع عمال بالدور

واقفين للقطن طابور

يلا الضم خيطك في برموده

لأجل ما تحصد زهره في توت 

توت توت يا صياد

بنفسج جايلك يصطاد

أدي شبكة لأجل الوزان

وأدي شبكة فيها عرقين زان

وأدي شبكة م النيل بتجود

يا بنفسج يا أبو دايرة كبيرة

والرسمة شبه القميرة "القمر"

يلا ارسم واظهر الألوان

دي الرسمة بتلات أبعاد

إلى بنفسج

25 يناير 2016

كان ياما كان يا بنفسج

كان ياما كان يا بنفسج

كان في الحب وكان في البرد

كانت الدنيا جناين ورد

وعيال نونو في عرقوب أستك

تمسك كتفك تقطم وسطك لعب وحب وشد الحبل

كان ياما كان يا بنفسج

كان الدب يهب يشب يشد الحبل ينط يحط على رفوف ستك

قراقيش سكر جنب الورد

كان ياما كان يا بنفسج

كانت الدنيا رفوف ألوان في كفوف غلبان يقسم لقمة مع النعسان

يجري ويقطف م الألوان غزل بنات في عصاية بلاستيك

أدي لون بمبي م اللي في نفسك

وأدي لون أخضر يشبه حسك

لما تغني

غنوة بتزرع غيط في القلب

وغنوة بتطرح حبة قمح

وغنوة بتجني زهرة قطن

تقطف منها عقد اللولي

تغزل منه خيط تجيبه لي

أعمل منه شال للبرد 

كان ياما كان يا بنفسج

كنت بتجري ورا خيالات

يرقص كفك زي الأرنب

تقفش ضلك على حيط ستك

ماسك قلمه بيرسم حلم

حط الكف جار الكف

بقى عصفوره تطير وتغرد

حط الكف يحضن كف

بقى فراشايه وبالألوان

شال الكف يسلم كف

بقى جملك وعليه جمال

شال واتحط من الترحال

لف صحاري الدنيا الواسعة

صبره في سنمه فوقه بيسعى

 تحت الشمس ووسط البرد

كان ياما كان يا نفسج

إلى الطفل بنفسج أينما كان وارتحل

25 يناير 2016

القوس ده عمره ما انقفل

إياك في يوم تسيب القوس مقفول

 أصل العدد في بلدنا متروس

 مليون على مليون مغلول 

وسجون وكم مجنون يحكم بقبضة يد

 يبني ما بينا ألف سد وسد 

 إياك تقول خلاص الدم سال وإنساب 

حنى كفوف اليد

 لطخ حمار الخد 

من إمتى يا غلبان والدم هامم حد

في اليوم حريق وهموم تضيق

وقلوب تشيب قبل المشيب

كتر النحيب عجز صبايا الورد

 جثامين وداع فى سنين خداع

مقهورة كبد أمها باكية على الولدان

شوف كم صبي على كم نبي

لبسوا كفاني الغدر

اتغسلوا بالبكا

والنعش ضمة صدر

راح في البداية مئات

ومئات تشد مئات تسرسب سنابل قمح من كف البلد   

 القوس ده عمره ما انقفل

مهزوز بجرة قلم

إوعاك تصدق أنه في يوم
قوس الحياة مرة اتقفل

وحده كتاب اللغة يضحك على القارىء

يقفل قوسين هلالين

أما كتاب الحياة فهلاله لم يكمل

فاتح ومستنظر 

بيشبك الأسماء اسمين ورا اسمين

تصنيف يضم الكل

مفتوح وعمره ما كلْ

عن ضمه للشهداء

عن مقاتيل الغدر

  

صُحبة فى عمر حزين

تحيا جمهورية مصر العربية... تحيا جمهورية مصر العربية ...تحيا جمهورية مصر العربية

 رن الجرس
وقفوا التلامذة صفوف في حوش المدرسة
شوف كم مهرسة على مهرسة
شوف كم طابور داخل حيطان المدرسة
مترصصه فوق الكتاف مخله
تقطم ضهور نن العيون الطارح فجر لنهار بكره
أطفال صوتها يدوي في تحية العلم
يتقال لهم صفا يتقال لهم انتباه
يا بكره الجاي طارح عمر النهار ما تاه
الدم لون علمك أبيض ده لون قلبك
أسود غطيس ذنبك يا قاتل الصباح
متشبكة الضفاير مع  إيد عُمر اللي ثاير