القوس ده عمره ما انقفل

إياك في يوم تسيب القوس مقفول

 أصل العدد في بلدنا متروس

 مليون على مليون مغلول 

وسجون وكم مجنون يحكم بقبضة يد

 يبني ما بينا ألف سد وسد 

 إياك تقول خلاص الدم سال وإنساب 

حنى كفوف اليد

 لطخ حمار الخد 

من إمتى يا غلبان والدم هامم حد

في اليوم حريق وهموم تضيق

وقلوب تشيب قبل المشيب

كتر النحيب عجز صبايا الورد

 جثامين وداع فى سنين خداع

مقهورة كبد أمها باكية على الولدان

شوف كم صبي على كم نبي

لبسوا كفاني الغدر

اتغسلوا بالبكا

والنعش ضمة صدر

راح في البداية مئات

ومئات تشد مئات تسرسب سنابل قمح من كف البلد   

 القوس ده عمره ما انقفل

مهزوز بجرة قلم

إوعاك تصدق أنه في يوم
قوس الحياة مرة اتقفل

وحده كتاب اللغة يضحك على القارىء

يقفل قوسين هلالين

أما كتاب الحياة فهلاله لم يكمل

فاتح ومستنظر 

بيشبك الأسماء اسمين ورا اسمين

تصنيف يضم الكل

مفتوح وعمره ما كلْ

عن ضمه للشهداء

عن مقاتيل الغدر

  

حتى لا ننسى

حتى لا ننسى من طهرت دماؤهم ميادين مصر

أسماء شهداء الثورة المصرية

من مدونة

dustanddreams

حرق قلبكم شكل المجمع العلمى اللى أغلبكم كان بيمر جنبه ولا يعرف هو إيه أصلًا
وخرائط مصر وحدودها وحقها وتاريخا والتراث العظيم اللى كان من وقت الحملة الفرنسية -العلمية- ويمكن فى مخطوطات فيها من قبل الحملة كمان ريحوا قلبكم وطفوه بميه بس مش زى اللى بتترش على عيال مصر من إمبارح لدلوقت والعسكر إستخسر يطفى بها نارالمجمع العلمى ،أغلب النسخ اللى فيها موجودة فى دار الوثائق ومكتبة الإسكندرية ده غير النسخ الكتير اللى اتباعت للأمير فلان والشيخ علان لأجل كم مليم
بس وأنتم محروقين على المجمع والنار اللى أكلته ،فى نار بتاكل فى صدر أمهات كتير وعيال مصر اللى فى الميدان للأسف ما عملوش نسخ لعيالهم وأصحابهم فى دار الوثائق!!!

لا تصالح

لا تصالح ولو توجوك بتاج الرُتَب
فدم الشباب سال حتى الرُكب
وهتك النساء أمر محتدم
هل يصير دمي -بين عينيك- ماءً؟
أتنسى ردائي الملطَّخَ بالدماء..
تلبس -فوق دمائي- ثيابًا مُطرزةً بالقصب؟
إنها الحربُ!
قد تثقل القلبَ..
أتنسى هتك عرض النساء
ومصر التي جلست تنتحب
فجيش الرجال الشامخون العظام
دهسوا بالأقدام رأسًا تلو رأس
ووقفوا على الشرفات يتناوبون الرقص
قل لهم :أنهم لم يراعوا حق الأخوة في نسل الوطن
واغرس السيف في جبهة أنصار الكنب
فلا الآرائكِ تدوم ولا ساسة النُخب
لا تصالح
ولو وقفت ضد سيفك كل الشيوخ
والرجال التي ملأتها الشروخ
هؤلاء الذين تدلت عمائمهم فوق أعينهم
وسيوفهم العربية قد نسيت سنوات الشموخ
لا تصالح
فليس سوى أن تريد
أنت فارسُ هذا الزمان الوحيد
وسواك.. المسوخ!
"أمل دنقل بتصرف">>>> كُتبت على نهج لا تصالح فى وقت انتهاك العسكر للثورة والثوار.

حب الوطن

-->

حُب الوطن فرض عليَّ
أفديه بروحي وعينيَّ
ليه يا وطن أمنك قاسي
بمداسه دايس على راسي
أخدني من أهلي وناسي
قتلني وبضربة قوية

كنا زمان ننعس بدري أو وخري
أمنك يحرسنا
جه اللي ماسك في الكرسي
بكلابه عايز يخرسنا
سحلوني والشَدة غبية
لا قالوا شاب ولا صبية
عسكر ورافع لسلاحه
في وش من قال يوم
لأ
لا قلت همشي في مظاهرة
ورسمت يافطة أطوف بها
كل اللى قُلته في يوم
لأ
وأخدت بعدِها الزقة
شخطوا وخبطوني الخبطة
رحت يا وطن قتيل فيها
ليه يا وطن أمنك قاسي
وحب الوطن فرض عليَّ؟!!!!!