الزير سالم بن ربيعة جزء ثان...كلمات

المجموعة:-"جساس ده ما نامش فى ليلته 

من قلة راحته وحيرته 

خايف من الزير سالم هو وأهل قبيلته"
الراوى:-

"جليلة خافت من الزير سالم الجبار خافت وفاتت بناتها لوحدهم فى الدار راحت لجساس أخوها اللى قتل زوجها وتقول له يا ويلك يا غادر والزمن دوار"
زينب يونس:-

وقامت الحرب بين الزير وبين جساس

سنين طويلة وسببها حاجة ما لها أساس

بنى مُره فقدت رجال والحرب خوانه

أما ربيعة انفقد منها كرام الناس
المجموعة:-

وأخت اليمانى اللى السبب 

واللى يحق لها الأدب

قاعدة فى دارهم تعمل ايه 
زينب يونس:-

قاعدة تبخ سمومها وتقيد الفتايل 

وغرضها ومرادها تفريق القبايل
الراوى:-

"كانوا قبيلتين نسايب ،كانوا قبليتين قرايب قامت ما بينهم حروب وفيها شافوا العجايب ولما جساس حس بحلول الهزيمه وحس إن حياته راح تبقى أليمة قال يا سعاد انجدينى قال يا سعاد دبرينى فلت الزمام من ايديا"
زينب يونس:-

ردت سعاد أخت اليمانى وقالت 

مادام الحرب بينه وبينك طالت

فكرت فى حيلة ما تخطر على بالك 

نقضى عليه وبعدها يطيب حالك

أنا اللى هقضى لك على الزير سالم 

وأنت فى دارك مستريح وسالم

هبعت غندوره فى خيمته تغنى له 

وتصب الخمر بإيديها وتديله

ولما تشوفه قدامها بيتمايل 

وحاله من كتر الشراب بقى مايل 

تسحب خنجرها وفى قلبه وتديله 

وبموت الزير هترتاح القبايل
المجموعة:-

اااه اااااااه ااااااه اااااااااااه اااااااااااااه ااااااااااااه اااااااااااه

اه يا ويل اللى يخونوه اه ياويل اللى يؤذوه

اااه اااااااه ااااااه ااااااااااه اااااااااااه اااااااااااااه اااااااااااه

اه يا ويلهم
الراوى:-

"الجرو بن كُليب شب وبقى فارس للطعن ويا النزال أصبح لهم دارس قادت نيران الفتى لما قالوا له الناس كليب أبوك انقتل بالغدر من جساس ونادى لأمه جليلة قال لها أمى قولى لى الحقيقة لأسقيكى مرار الكاس"
زينب يونس:-

قالت له على الحكاية ومبدأ الرواية

وسعاد أخت اليمانى هى سبب الجناية

ركب فرسته وطار والقلب قايد نار

وراح لعمه لقاه فى خيمة قرب الدار

قاعد بيشرب وشاف غندوره بتغنى

قسمها نصين قصاد عمه بسيف بتار

بعتت غندوره لأجل تقتل عمك 

وأدى الحقيقة عرفتها من أمك
الراوى:-

"استعجب الزير وقال ايه ذنب غندوره قال له ياعمى الصبية جاية مأجوره دى حيله من أجل قتلك واللى دبرها أخت اليمانى اللى جاية ديارنا مسعورة"
زينب يونس:-

قال له ياعمى تعالى معايا 

ده كل أول وله نهايه

أنا بسيفى وأنت بسيفك 

يلا ياعمى ننهى الحكايه
الراوى:-

"راحوا لجساس لقوه هو وسعاد قاعدين قضوا عليهم وتاوهوم فى غمضة عين"
زينب يونس:-

راحوا لجساس لقوه وهو وسعاد قاعدين

قضوا عليهم وتاوهوم فى غمضة عين

واتجمعوا الناس وعرفوا حكاية الناقة

اللى السبب فى البلية وفرقة الحبيبين
المجموعة:-

والحق عاد ورجع لأصحابه والسعد لهم فتح أبوابه

 وعاش الجرو مع الزير سالم يسعد حياة أهله وأحبابه...

الزير سالم بن ربيعة جزء أول ... كلمات

المجموعة:-
الزير سالم الزير سالم الزير سالم بن ربيعة الزير سالم

 الزير سالم الزير سالم الزيرسالم بن ربيعةالزير سالم

الزير سالم بن ربيعة أشجع فارس من الفرسان

 ياما له فى الحرب أيادى وياما هابوه كل الشجعان

الزير سالم الزير سالم الزير سالم الزير سالم بن ربيعة الزير سالم
زينب يونس:-

والقصة دى تبتدى لما كُليب أخوه

 نادوا به أهل البلد يحكم على ديارهم

وعمه وولاد عمه كلهم بايعوه

 إكمنه هزم اليمانى وعلىّ مقدارهم
المجموعة:-

الست الجميلة الغالية جليلة ايش تكون أخبارها
زينب يونس:-

 لكُليب جوزوها وقاموا لها الأفراح

ومُره أبوها اطمن وارتاح
المجموعة:-

والزير سالم اللى عليه حكايتنا قولى عليه يا راوية وسمعينا
زينب يونس:-

عاش مع أخوه كُليب كان له أعزحبيب

 قالوا الناس عن سيفه للأعداء طبيب
المجموعة:-

وأهل اليمانى إيه جرى لهم احكى يا راوية على حالهم 
زينب يونس:-

قالوا لابد إننا نمحى بسيفنا العار

لازم نقوم كلنا نسعى لأخد التار

ونروح نحارب كُليب واللى معاه فى الدار

ياويل كُليب مننا هو وأخوه الزير

 لازم حقوقنا لنا ترجع يا أهل الدار
الراوى:-

"قامت سعاد أخت اليمانى التُبع تحذر الناس من الحروب وتمنع

قالت لهم لو حد راح وحاربهم ولا أى فارس من الديار راح يرجع"
زينب يونس:-