السودان شهدت في الفترة الأخيرة انهيار اقتصادي شديد جدًا وقرارات حكومية مؤذية، تعويم العملة السودانية واقتراب الدولار الأمريكي من سعر 50 جنيه سوداني في البنوك، وما يقارب الـ 80 جنيه في السوق. ووصل الوضع إن الحكومة ماعندهاش سيولة تضخها في البنوك، مع التلويح بالضغط على التجار اللي أغلبهم ماحطوش فلوسهم في البنك خوفًا من أنهم ما يلاقوهاش تاني، وفي أول الشهر اتحرق سوق أمدرمان وهو واحد من أقدم وأكبر أسواق السودان وفضلت الحريقة أزيد من 8 ساعات شغالة لحد ما المحلات والبضايع فحمت ووصلت الخساير لـ 850 مليار جنيه. وظهر معتمد أمدرمان وقال حذرناهم من حريق هيحصل وبعدها لحق نفسه وقال حذرناهم إن لازم توسعوا الطرق علشان ماتحصلش كارثة وحريق. والكلام ده كان في 2ديسمبر الحالي، والأسبوع ده حصلت حريقة في سوق نيالا وهو سوق كبير ولا يقل أهمية عن سوق أم درمان، وطبعًا خراب مستعجل مع ارتفاعات مستمرة في الأسعار. لحد امبارح قامت الناس في عطبرة وما قعدتش. عطبرة مدينة صناعية وعمالية شبيهة لحلوان عندنا. وبيتقال عنها أرض الحديد والنار ده غير أنها آخر محطة مقرن أي ملتقى رافدي لنهر النيل قبل ما يروح على مصر. السودان بيقوم فيها تظاهرات من وقت للتاني واعتقالات لكن كانت حشود وشعارات وخلاص، المرة دي كانت الكبيرة حريق في مقر الحزب الحاكم في عطبرة وده شي مش هين أبدًا. وتم إعلان الطوارئ امبارح على عطبرة، والنهارده الاحتجاجات ممتدة لما حولها يعني من قيمة ساعة خروج الطلبة في بربر وهي مدينة جنب عطبرة ولو الحكومة ما أعلنتش قرارات تهدي الناس المسألة هتستمر...

هاي
الصادق المهدي مالوش علاقة باللي بيحصل اليوم في السودان وتحديدا عطبرة كون توافق مجيئه مع اندلاع الاحتجاجات الواسعة مع ذكرى إعلان الاستقلال مالوش علاقة باللي جاري علاوة على أنه المفروض هيدفن أخوه النهارده ولا بكره
باي

أمثال مصرية

هنا سأدون من فترة لأخرى الأمثال المصرية التي أتذكرها أو تمر علي في يومي أيًا كان تاريخه.هو مشروع قديم ولكن تأخرت في إخراجه.

* من سعده زمانه جاب بناته قبل صبيانه.
سعده = أسعده

* بخت العور هد الدور.

*  إن كانت عاوز تخطب خد لك رفيعة الوسط وإن كانت عاوز تمص قصب خد لك بيتين من الوسط.

* في القهر مدعية وفي الفرح منسية.

* يا جايبه في قفة خده في شليتة وروح.
* الشيخ البعيد سره باتع.
* وإن فاتك عنب مسرى إلحق رطب توت.
* قعدتي بين أعتابي ولا قعدتي بين أحبابي.
* إن بدك تفرح ابني كل سنة مطرح.
* إيش خاطر الأعمى، قفة عيون.
* ربنا ما بيديش الأعف عدله.
* خلف البنات بيحوج لنسب الكلاب.
* كل كار ستورة إلا كار الجاعورة.
* يا حسرة قهرك في ضهرك.
* امشي على كدك ما تمدش تشفى جروحك ما تمدش وللغير ايدك ما تمدش.
* ما دوب إتيابنا إلا أعز أحبابنا.
*  من يوم جبتكم يا دلالة ما نمت مع أبوكم عريانة ولا كلت بصلة بورقها ولا خسة بعصبها.