شموا شمو

زى النهارده من ما يقرب لــ 7000 سنة الأجداد كانوا بيحتفلوا بيوم شمو يوم بدء الخلق و الخليقة فى الميثولوجيا المصرية اليوم اللى بدأت فيه الحياة و اتخلق الكون ، الأجداد كانوا فى ليلة شمو بيعلقوا غصن شجر أخضر على شبابيكهم و وياه بيض مكتوب عليه الأمانى والأحلام و بصل متعلق يطرد الشر و المرض .
الأجداد كانوا بيخرجوا فى يوم شمو من أول طلعة النهار علشان يبدأوا مع بداية الحياة و أجسامهم تشم الحياة و تتعافى من أى مرض اللى كان بيصحى متأخر بتبكون سنته سيئة و معرض للمرض لأنه ما خادش البدرية ، الأجداد كانوا بيشموا الهوا النضيف ويتفسحوا فى الجناين و يغتسلوا من مياه النيل و يأكلوا البيض اللى شبه الكرة الأرضية شبه الكون و مخرج الحياة المتمثلة فى الكتاكيت الصغيرة ، و البصل علشان يتقوا شر المرض و الخس علشان تزيد خصوبتهم و يجيبوا ذرية جديدة مصحصحه ، الأجداد كانوا بيحبوا ينبسطوا مع بعض و يفرحوا و يشموا الهوا النضيف و يتأملوا الكون و الخلق و جمال الطبيعة النعمة اللى عايشين فيها... حاولوا تفرحوا!