صُحبة فى عمر حزين

تحيا جمهورية مصر العربية... تحيا جمهورية مصر العربية ...تحيا جمهورية مصر العربية

 رن الجرس
وقفوا التلامذة صفوف في حوش المدرسة
شوف كم مهرسة على مهرسة
شوف كم طابور داخل حيطان المدرسة
مترصصه فوق الكتاف مخله
تقطم ضهور نن العيون الطارح فجر لنهار بكره
أطفال صوتها يدوي في تحية العلم
يتقال لهم صفا يتقال لهم انتباه
يا بكره الجاي طارح عمر النهار ما تاه
الدم لون علمك أبيض ده لون قلبك
أسود غطيس ذنبك يا قاتل الصباح
متشبكة الضفاير مع  إيد عُمر اللي ثاير
تدخل قلب الفصول
يا سايرين على الأرض
متشبكين كالورد صحبة في عمر حزين
لا الوقت ده وقتكم ولا المكان حقكم
وده عُرف السجانين قاتلين نهار بكره
ووشوشهم العِكره مليانه منكم خوف
ده أنتم المداد والشوف
ما أنتم نهار بكره
فتحوا الكتاب طرحوا الحساب أعمار
ما أنتم جيل ابن موت يكره كلمة سكوت
يصرخ وبأعلى صوت في تحية العلم
يا مصر صبحك راح
متمرمغ في التراب معجون طينك بدمه
مسموم كبدك بهمه يوم ما فكر يكون
نفسي أكون إنسان نفسي أعيش في أمان
نفسي أتعلم و أقرأ أو أكتب على الحيطان
طفلي ده فجر بكره والموت ده للسجان...